By Ra Wai / MPA
ယနေ့နံနက် ကိုးနာရီခန့်တွင် TNLA အုပ်ချုပ်နေသော မိုးကုတ်မြို့၊ လူနေရပ်ကွက်ထဲသို့ စစ်တပ်က ဗုံးနှစ်လုံးကြဲချခဲ့ရာ ပန်းရန်ဆရာတစ်ဦး သေဆုံးသွားကြောင်း ကနဦး သတင်းရရှိသည်။
မန္တလေးတိုင်း၊မိုးကုတ်မြို့အနောက်ပိုင်း၊ကသည်းရပ်ကွက်ထဲသို့ စစ်ကောင်စီတပ် လေယာဉ်ဖြင့် ကြဲချသည့် ဗုံးများ ကျရောက်ခဲ့ခြင်းဖြစ်ပြီး ဒဏ်ရာရသူများလည်း ရှိကြောင်း မိုးကုတ်မြို့ခံ သတင်းရင်းမြစ်ထံမှ သိရသည်။
“အခုလောလောဆယ် ထိခိုက်တာ ဘယ်နှစ်ဦးလဲ မသိသေးဘူး။ အခု ဗုံးကျတဲ့ အိမ်ဘေးမှာ မူကြိုရှိတယ်။ ကလေးတွေ နည်းနည်းထိတယ်လည်း ကြားတယ်။ ဗုံးကျတဲ့အနားကို ပေးမသွားဘူး။ လမ်းပိတ်ထားတယ်”ဟု ၎င်းက MPA သို့ပြောသည်။
မတ်လနှစ်ရက်၊ ည ၁၁ နာရီ ၄၇ မိနစ်နှင့် ၁၂ နာရီခန့်တွင်လည်း မိုးကုတ်မြို့အနောက်ပိုင်း၊အုတ်အင်းဓမ္မာရုံနှင့် မိုးကုတ်မြို့အရှေ့ပိုင်း၊ ဗမွန်ရွာ တောထဲသို့ စစ်တပ်ကြဲချသည့် ဗုံးနှစ်လုံး ကျရောက်ခဲ့ရာ ဓမ္မာရုံ ပျက်စီးသွားပြီး လူထိခိုက်မှုမရှိကြောင်း သိရသည်။
တရုတ်၏ စီစဉ်မှုအရ ဧပြီ ၂၈ ရက်နှင့် ၂၉ ရက်တို့တွင် ပြုလုပ်သည့် TNLA နှင့် စစ်ကောင်စီတို့၏ ကူမင်းဆွေးနွေးပွဲမှာ သဘောတူညီမှုမရခဲ့ကြောင်း မေနှစ်ရက်၌ TNLA က ထုတ်ပြန်ပြီးနောက် စစ်တပ်က TNLA အုပ်ချုပ်နေသည့် မိုးကုတ်မြို့ကို နှစ်ရက်ဆက် ဗုံးကြဲခြင်းဖြစ်သည်။
