By Nway / MPA
မန္တလေးတိုင်း၊ မတ္တရာမြို့နယ်အရှေ့ခြမ်းတွင် စစ်ကောင်စီတပ်ပစ်ခတ်သည့် လက်နက်ကြီးကျည်ထိမှန်ကာ နွားကျောင်းနေသည့် အမျိုးသားတစ်ဦးသေဆုံးပြီး တစ်ဦးပြင်းထန်ဒဏ်ရာရရှိခဲ့ကြောင်းသိရသည်။
ဧပြီ ၂၉ရက်၊ နေ့ခင်း ၁၁နာရီ ၄၇မိနစ်ခန့်တွင် မတ္တရာမြို့နယ်၊ မြကံသာရွာစစ်တပ်အထိုင်စခန်းမှ လက်နက်ကြီးသုံးလုံးပစ်ခတ်ခဲ့ရာ လမိုင်းကွက်သစ်ရွာ၊ ကြက်ခြံဟောင်းအနောက်ဘက်သို့ တစ်လုံး ကျရောက်ပေါက်ကွဲပြီး နွားကျောင်းနေသည့် အသက် ၄၀အရွယ်အမျိုးသားတစ်ဦးသေဆုံးကာ အသက် ၃၀အရွယ်အမျိုးသားတစ်ဦး ပြင်းထန်ဒဏ်ရာရရှိခဲ့ကြောင်း ဒေသတွင်း နွေဦးတော်လှန်ရေး စာမျက်နှာ Voice Of Mandalay အဖွဲ့က သတင်းထုတ်ပြန်သည်။
” တယောက်က ပွဲချင်းပြီး သေတယ်။ တယောက်က တော်တော်စိုးရိမ်ရတယ်။ သိပ်တော့မသေချာဘူး။ အသည်းအသန် အသက်ကတော့ လုနေရတယ်။ နွားလွှတ်ကျောင်းတဲ့အချိန်မှာ နွားတွေနဲ့ လူတွေနဲ့ တစ်လုံးတည်းပါသွားတာ” ဟု Voice Of Mandalay အဖွဲ့၏ မြေပြင်သတင်းရင်းမြစ်တစ်ဦးက MPA သို့ပြောသည်။
လက်နက်ကြီးပစ်ခတ်မှုကြောင့် ထိခိုက်ပျက်စီးမှုမရှိသော်လည်း နွားတစ်ကောင်သေဆုံးခဲ့ကြောင်း သိရသည်။
ယနေ့ (ဧပြီ ၃၀ ရက်) နံနက် ၁၀နာရီခန့်ကလည်း မတ္တရာမြို့နယ်အရှေ့ခြမ်းတစ်နေရာ၌ စစ်ကောင်စီတပ်၏ ဗုံးသီးပါဒရုန်းသုံးစင်း ပျံဝဲနေကြောင်း သိရသည်။
စစ်ကောင်စီတပ်သည် ဧပြီနှစ်ရက်မှ ယနေ့အထိ အပစ်ရပ်ကြောင်း ကြေညာထားပြီး မြန်မာနိုင်ငံ တစ်ဝန်း လေကြောင်းမှ ဗုံးကြဲခြင်း၊ လက်နက်ကြီးဖြင့် ပစ်ခတ်ခြင်းနှင့် စစ်ကြောင်းထိုးခြင်းတို့ လုပ်ဆောင်လျက်ရှိသည်။
