By Hlaing / MPA
အင်အားပြင်းငလျင် လှုပ်ခတ်ခဲ့သည့် မတ် ၂၈ရက်မှ တစ်လပြည့် ဧပြီ ၂၈ရက်အထိ စစ်ကောင်စီက တစ်လအတွင်း ရခိုင်ပြည်နယ်ကို အကြိမ် ၃၀ထက်မနည်း လေကြောင်းတိုက်ခိုက်ခဲ့ကြောင်း MPA ကပြုစုထားသည့် စာရင်းများအရ သိရသည်။
စစ်ကောင်စီက ငလျင်ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများ လုပ်ကိုင်နိုင်ရန်ဟုဆိုကာ ဧပြီ နှစ်ရက်မှ ၂၂ရက်အထိ ယာယီပစ်ခတ်တိုက်ခိုက်မှု ရပ်စဲကြောင်း ထုတ်ပြန်ခဲ့သည့်အပြင် ဧပြီ ၂၃ရက်မှ ဧပြီ ၃၀အထိ ထပ်မံ သက်တမ်းတိုးသည်ဟု ထုတ်ပြန်ထားသည်။
ထိုကဲ့သို့ စစ်ကောင်စီက ယာယီပစ်ခတ်တိုက်ခိုက်မှုရပ်စဲရေး ထုတ်ပြန်ထားသော်လည်း ရခိုင်ပြည်နယ်တွင် နေ့စဥ်နှင့်အမျှ တိုက်ပွဲများဖြစ်ပွားနေပြီး၊ တိုက်ပွဲဖြစ်ပွားခြင်းမရှိသည့် ကျောက်တော်၊ မြောက်ဦး၊ တောင်ကုတ်နှင့် ပေါက်တောမြို့နယ်တို့တွင်လည်း ရည်ရွယ်ချက်ရှိရှိ လေကြောင်းတိုက်ခိုက်မှုများ လုပ်ဆောင်ခဲ့သည်။
၂၀၂၅ ခုနှစ်၊ မတ် ၃၀ ရက်၊ ည ၇ နာရီဝန်းကျင်၌ စစ်ကောင်စီက ကျောက်ဖြူမြို့နယ်ရှိ ကုလာဘကျေးရွာကို ဗုံးနှစ်လုံးကြဲချတိုက်ခိုက်ခဲ့ရာ နေအိမ်နှင့် ဆိုင်ခန်းတချို့ ပျက်စီးခဲ့ပြီး၊ မတ် ၃၁ ရက်၊ ည ၈ နာရီဝန်းကျင်၌လည်း တိုက်ပွဲဖြစ်ပွားခြင်းမရှိသည့် မြောက်ဦးမြို့ပေါ်ရှိ လေးနေရာထက်မနည်း ဗုံးကြဲတိုက်ခိုက်ခဲ့၍ အလယ်စျေးရပ်ကွက်မှ အသက် ၆၀ နှစ်အရွယ် အမျိုးသားတစ်ဦး ဗုံးစထိမှန်ကာ သေဆုံးခဲ့သည်။
“ မြောက်ဦးမှာ လေယာဥ်ကတော့ ညတိုင်းလိုလိုကို ဝဲတယ်။ တခြားနေရာတွေလည်း ကြဲချသွားတာမျိုးလည်း ရှိတယ်။ အတက်နေ့ကဆို ဂျက်ဖိုက်တာတောင်လာတယ်။ သတိနဲ့ နေနေရတာပေါ့” ဟု မြောက်ဦးမြို့နယ်အတွင်း နေထိုင်သူ အသက် ၂၅ နှစ်အရွယ် အမျိုးသမီးတစ်ဦးက MPA သို့ ပြောသည်။
ထို့ပြင် ဧပြီ နှစ်ရက်တွင် ရခိုင်ပြည်နယ်၊ ကျောက်ဖြူမြို့နယ်ရှိ ဓညဝတီရေတပ်စခန်း၊ ဒိုးတန်းတောင် အမှတ် ၃၂ ရဲတပ်ရင်းတို့ရှိ စစ်ကောင်စီတပ်သည် သပြုတောင်၊ ပြားတဲနှင့် ပြင်ရှည်ကျေးရွာအနီးဝန်းကျင်သို့ Drop Bomb အရေအတွက် ၉၀ ကြိမ်ခန့်နှင့် လက်နက်ကြီးပစ်ခတ်မှု ၆၀ ကြိမ်ထက်မနည်းပြုလုပ်ခဲ့သည့်အပြင် ဧပြီ သုံးရက်နေ့မှ ငါးရက်နေ့အထိ လက်နက်ကြီး၊ လေကြောင်းတိုက်ခိုက်မှုများ လုပ်ဆောင်ခဲ့သည်ဟု AA က ထုတ်ပြန်ထားသည်။
ယင်းအပြင် ဧပြီ ငါးရက်၊ နံနက်ပိုင်းတွင် စစ်ကောင်စီက တောင်ကုတ်မြို့နယ်ရှိ စလူးကျေးရွာကို ဂျက်ဖိုက်တာအသုံးပြု၍ ဗုံးကြဲတိုက်ခိုက်ခဲ့ရာ အသက် ၄၀ အရွယ် အမျိုးသမီးနှစ်ဦးနှင့် ကလေးငယ်တစ်ဦး ထိခိုက်ဒဏ်ရာများ ရရှိခဲ့ပြီး၊ ဧပြီ ၁၁ ရက်တွင်လည်း ပေါက်တောမြို့နယ်ရှိ အနောက်ရဲကျေးရွာကိုလည်း ဂျက်ဖိုက်တာအသုံးပြု၍ ပေါင် ၅၀၀ ဗုံး နှစ်လုံးဖြင့် ဗုံးကြဲတိုက်ခိုက်ခဲ့ကြောင်း ဒေသတွင်းမီဒီယာများ၏ ဖော်ပြချက်အရ သိရသည်။
ဆက်လက်ပြီး ဧပြီ ၁၃ ရက်၊ သင်္ကြန်အကြိုနေ့၊ နံနက် ကိုးနာရီ ၃၀ မိနစ်အချိန်တွင် စစ်ကောင်စီက တိုက်ပွဲဖြစ်ပွားခြင်းမရှိသည့် ကျောက်တော်မြို့ပေါ်ရှိ ပြည်တော်သာရပ်ကွက်၊ ရွှေကျောင်းအနောက်ဘက် အနီးဝန်းကျင်ကို ပေါင် ၅၀၀ ဗုံး နှစ်လုံးဖြင့် ဗုံးကြဲတိုက်ခိုက်ခဲ့၍ အမျိုးသမီး သုံးဦး ထိခိုက်ဒဏ်ရာများ ရရှိခဲ့သည်။
ဧပြီ ၁၉ ရက်၊ နံနက် နှစ်နာရီ ၃၀ မိနစ်အချိန်တွင်လည်း စစ်ကောင်စီက တိုက်ပွဲဖြစ်ပွားခြင်းမရှိဘဲ ရည်ရွယ်ချက်ရှိရှိ ကျောက်တော်မြို့ပေါ်ရှိ သမဝါယမ၊ ပြည်တော်သာ ကတ ၆ လမ်း၊ ကတ ၇ လမ်း၊ ကတ ၈ လမ်း၊ မြို့သစ်ရပ်ကွက်၊ ရှမ်းရွာရပ်ကွက်တို့ကို ဂျက်ဖိုက်တာနှစ်စင်းဖြင့် ဗုံးအလုံးရေ ၁၀ လုံးကျော်ခန့် ကြဲချခဲ့ရာ အသက် ၄၀ နှစ်အရွယ် အမျိုးသားတစ်ဦး သေဆုံးကာ၊ လူဦးရေ ၂၀ ဝန်းခန့် ထိခိုက်ဒဏ်ရာများ ရရှိခဲ့သည်။
“ ည နှစ်နာရီခွဲနဲ့ သုံးနာရီကြားထဲမှာ လူနေရပ်ကွက်တွေထဲကို ဗုံးကြဲသွားတာ၊ အိမ်တွေ တော်တော်များများ ပျက်စီးတယ်။ ညအိပ်ကောင်းချိန်ကြီး ဗုံးကြဲတာ ဆယ်လုံးကျော်တယ်” ဟု မြေပြင်အခြေအနေကိုသိရှိသူ အမျိုးသားတစ်ဦးက ဆိုသည်။
ဧပြီ ၂၄ ရက်၊ မွန်းလွဲ သုံးနာရီခန့်တွင်လည်း စစ်ကောင်စီက နှစ်ဖက်တပ်ဖွဲ့များကြား တိုက်ပွဲပြင်းထန်နေသည့် ကျောက်ဖြူမြို့နယ်ရှိ ရေနံတောင်ကျေးရွာကို အသေခံဒရုန်းဖြင့် ဗုံးကြဲတိုက်ခိုက်ခဲ့ရာ စစ်ရှောင်အမျိုးသမီးတစ်ဦး သေဆုံးခဲ့ပြီး၊ ဧပြီ ၂၅ ရက်တွင်လည်း လိပ်ခမော်ကျေးရွာကို ဒရုန်းဖြင့် ဗုံးကြဲတိုက်ခိုက်မှုကြောင့် အရပ်သားပြည်သူ သုံးဦး သေဆုံးခဲ့ရသည်။
“ ကျောက်ဖြူမှာက တိုက်ပွဲတွေလည်း ဖြစ်နေတော့ အမေတို့ကို ခေါ်ပြီး ရန်ကုန်ကို ပြောင်းလာလိုက်တာ။ အသက်ကြီးတဲ့သူတွေဆိုတော့ ရန်ကုန်မှာ မနေချင်လည်း နေနေရတာပေါ့” ဟု ရန်ကုန်မြို့သို့ ပြောင်းရွေ့နေထိုင်နေသည့် ကျောက်ဖြူဒေသခံအမျိုးသားတစ်ဦးက ဆိုသည်။
စစ်ကောင်စီအနေဖြင့် ၂၀၂၅ ခုနှစ်၊ မတ် ၂၈ ရက်တွင် လှုပ်ခတ်ခဲ့သည့် အင်အားပြင်ငလျင်ကြောင့် ဧပြီ တစ်လတာအတွင်း ယာယီပစ်ခတ်တိုက်ခိုက်မှုရပ်စဲရေးဟု ထုတ်ပြန်ထားသော်လည်း ကချင်၊ စစ်ကိုင်း၊ မန္တလေး၊ ပဲခူး၊ မကွေးနှင့် ရခိုင်ပြည်နယ်တို့ရှိ အရပ်သားပြည်သူများနေထိုင်ရာ နေရာများကို လက်နက်ကြီး၊ စက်တပ်လေထီး(Paramotor)၊ ဒရုန်းနှင့် လေယာဥ်များအသုံးပြု၍ ဗုံးကြဲတိုက်ခိုက်မှုများကို လုပ်ဆောင်လျက်ရှိနေသည်။
