By Ra Wai / MPA
မကွေးတိုင်း၊ စလင်းမြို့အဝင် စစ်ဆေးရေးဂိတ်ကို PDFတပ်ဖွဲ့များက အနီးကပ်ဝင်ရောက်တိုက်ခိုက်ခဲ့ရာ စစ်သားနှင့်ပျူစောထီး ရှစ်ဦးသေဆုံးကြောင်းသိရသည်။
ယနေ့ (ဧပြီ ၂၆ ရက်) နံနက် ၅နာရီ ၂၄မိနစ်ခန့်တွင် စလင်းမြို့အနောက်ဘက်အထွက် ဝက်သည်းကန်အနီးရှိ စစ်ကောင်စီတပ်စခန်းတစ်ခုကို မီတာ ၃၀အထိ အနီးကပ်ဝင်ရောက်ပစ်ခတ်ခဲ့ရာ ထိတွေ့တိုက်ပွဲ မိနစ် ၂၀ခန့်ဖြစ်ပွားခဲ့ကြောင်း Yenanthar Column က သတင်းထုတ်ပြန်သည်။
” စလင်းမြို့အဝင်စစ်ဆေးရေးဂိတ်ပါဗျ။ စစ်ဆေးရေးဂိတ်မှာ ၁၅ယောက်ဝန်းကျင်ပဲရှိတယ်ဗျ။ ဂိတ်ကနေ လက်နက်ငယ်တွေနဲ့ပြန်လည်ခုခံကြပြီး ရှမ်းရွာကုန်းဘက်ကနေ ၆၀မမနဲ့လက်နက်ကြီးပစ်ကူပေးတယ်ဗျ” ဟု Yenanthar Column မှ တာဝန်ရှိသူတစ်ဦးက MPA သို့ပြောသည်။
တိုက်ပွဲဖြစ်ပွားနေစဉ် ကံပြားရဲစခန်းမှ စစ်ကူများထွက်လာသည့်အတွက် ပြန်လည်ဆုတ်ခွာခဲ့ရ ကြောင်း သိရသည်။
စစ်သားနှင့် ပျူစောထီးတို့ သေဆုံးမှုများကို တိုက်ပွဲအတွင်းပါဝင်သည့် ရဲဘော်များ၏ မျက်မြင်အရ အတည်ပြုနိုင်ကြောင်း ၎င်းကပြောသည်။
သေဆုံးသွားသည့် စစ်ကောင်စီတပ်ဖွဲ့ဝင်များကို ကားဖြင့်လာသယ်သွားပြီး ဒဏ်ရာရရှိသူများအား
မကွေးဆေးရုံ၌ ဆေးကုသမှုပေးနေကြောင်းသိရသည်။
ယင်းတိုက်ခိုက်မှုကို မကွေးတိုင်းပကဖရွေ့လျားစစ်ကြောင်း Yenanthar Column နှင့်အတူ မင်းဘူးခရိုင်အမှတ်ငါးတပ်ရင်းတို့ ပူးပေါင်းဆင်နွှဲခဲ့ခြင်းဖြစ်ပြီး PDF ရဲဘော်များအထိအခိုက်မရှိ ပြန်လည်ဆုတ်ခွာနိုင်ခဲ့ကြောင်းသိရသည်။
စစ်ကောင်စီတပ်ဖွဲ့ဝင်များ သေဆုံးမှုကို MPA အနေနှင့် သီးခြားအတည်မပြုနိုင်ပေ။
