By Hlaing / MPA
မကွေးတိုင်းမြောက်ပိုင်း၊ ဂန့်ဂေါခရိုင်၊ ယောဒေသ၌ စစ်ကောင်စီက ဧပြီလအတွင်း လေကြောင်းတိုက်ခိုက်မှု ဆယ်ကြိမ်ထပ်မနည်း လုပ်ဆောင်နေပြီး အမြောက်တပ်နှင့် ပျူစောထီးကျေးရွာများတွင် ရိက္ခာဖြည့်တင်းနေကြောင်း ဒေသခံများနှင့် တော်လှန်တပ်ဖွဲ့များထံမှ သိရသည်။
၂၀၂၅ ခုနှစ်၊ ဧပြီလအတွင်း ယောဒေသအတွင်းရှိ ဂန့်ဂေါ၊ ဆော၊ ကျောက်ထုနှင့် ထီးလင်းမြို့နယ်တို့တွင် တိုက်ပွဲဖြစ်ပွားခြင်းမရှိဘဲ စစ်ကောင်စီက ရည်ရွယ်ချက်ရှိရှိ လေကြောင်းအသုံးပြု၍ ဆယ်ကြိမ်ထပ်မနည်း ဗုံးကြဲတိုက်ခိုက်ခဲ့ခြင်း ဖြစ်သည်။
ထိုကဲ့သို့ ဗုံးကြဲတိုက်ခိုက်မှုများကြောင့် ဂန့်ဂေါမြို့နယ်အတွင်းရှိ ကန်၊ မွှေ့လယ်၊ သာလင်း၊ မြင်သား၊ ကျော်၊ နှမ်းခါး၊ ရွှေဘို၊ ကျောက်ပြုတ်၊ အင်းကျွန်း၊ ကုက္ကိုလ်နှင့် လယ်ကြားကျေးရွာ၊ ထီးလင်းမြို့နယ်အရှေ့ဘက်ခြမ်းရှိ ကျားခဲ၊ အကြည်ဘန်း၊ အလယ်ဘန်းနှင့် အညာဘန်းကျေးရွာ၊ ဆောမြို့နယ်အတွင်းရှိ ကျေးရွာများမှ ဒေသခံပြည်သူများ စိုးရိမ်ထိတ်လန့်နေကြရကြောင်း သိရသည်။
“ အကြတ်နေ့ကဆို အကြည်ဘန်းရွာနားကို ဗုံးကြဲသွားတာ၊ ဘယ်သူမှတော့ ထိခိုက်တာမရှိဘူး။ ဒါပေမဲ့လည်း စိုးရိမ်နေကြရတာပေါ့” ဟု ထီးလင်းမြို့နယ်အတွင်း နေထိုင်သည့် အသက် ၃၀ နှစ်အရွယ် အမျိုးသမီးတစ်ဦးက MPA သို့ ပြောသည်။
ယင်းအပြင် ၂၀၂၅ ခုနှစ်၊ ဧပြီ ၂၃ ရက်တွင်လည်း တိုက်ပွဲဖြစ်ပွားခြင်းမရှိဘဲ ဂန့်ဂေါမြို့ ခလရ ၅၀ တပ်ရင်းမှ ပစ်ခတ်သည့် လက်နက်ကြီးကျည်ကြောင့် ဂန့်ဂေါမြို့နယ်၊ ကျော်ကျေးရွာမှ အသက် ၆၀ နှစ်အရွယ် အမျိုးသားတစ်ဦးသေဆုံးကာ၊ ကိုယ်ဝန်ဆောင်အမျိုးသမီးငယ်တစ်ဦး ထိခိုက်ဒဏ်ရာရရှိခဲ့သည်။
“ သေသွားတာက အဖေဖြစ်သူပါ။ ကိုယ်ဝန်ရှစ်လလွယ်ထားတဲ့ သမီးဖြစ်သူကတော့ ခေါင်းကို လက်နက်ကြီးအစ မှန်သွားတယ်။ အိမ် လေးလုံးပျက်စီးသွားတယ်” ဟု အသက် ၃၅ နှစ်အရွယ် ဒေသခံအမျိုးသမီးတစ်ဦးက ဆိုသည်။
ထို့ပြင် စစ်ကောင်စီက ဧပြီ ၁၅ ရက်တွင် ဂန့်ဂေါမြို့ရှိ ခလရ ၅၀ တပ်ရင်း၊ ဧပြီ ၁၆ ရက်တွင် ကျောက်ထုအမြောက်တပ်ရင်း (အမတ – ၃၆၈)နှင့် ဧပြီ ၂၃ ရက်တွင် ဂန့်ဂေါမြို့နယ်မြောက်ပိုင်းရှိ ဟံသာဝတီပျူစောထီးကျေးရွာများတွင်လည်း ရဟတ်ယာဉ်များ အသုံးပြု၍ လက်နက်ခဲယမ်းနှင့် စားနပ်ရိက္ခာများ ပို့ဆောင်ခြင်းအပြင် တပ်သားအပြောင်းအလဲများ လုပ်ဆောင်နေကြောင်း သိရှိရသည်။
“ စစ်ကောင်စီက ဧပြီ ၂၄ ရက်ကနေ စပြီးဟံသာဝတီရွာဘက်ကနေ ကလေးမြို့နယ်ထဲ ကြံသာရွာကို အင်အားသုံးပြီးတော့ စစ်ကြောင်းထိုးနေတာမျိုးရှိတယ်ဗျ၊ ရွာတွေထဲကနေ အိမ်တိုင်းမလိုက်မနေရဆိုတဲ့ ပုံစံမျိုးနဲ့ခေါ်ပြီး ကြံသာဘက်ကို စစ်ကြောင်းထိုးနေတာပါ” ဟု ဒေသခံတော်လှန်ရေးတပ်ဖွဲ့ဝင်တစ်ဦးက ဆိုသည်။
ပြီးခဲ့သည့် ၂၀၂၅ ခုနှစ်၊ ဧပြီ ၁၁ ရက်တွင် ကလေးမြို့နယ်၊ ကြံသာကျေးရွာရှိ စစ်ကောင်စီနှင့် ပျူစောထီးများ တပ်စွဲထားသည့် တပ်စခန်းတစ်ခုကို ချင်းတော်လှန်ရေးပူးပေါင်းအဖွဲ့မှတိုက်ခိုက်သိမ်းပိုက်နိုင်ခဲ့ပြီး၊ လက်ရှိတွင် စစ်ကောင်စီက အဆိုပါ တပ်စခန်းကို ပြန်လည်သိမ်းပိုက်နိုင်ရန်အတွက် စစ်ကြောင်းထိုးနေခြင်း ဖြစ်သည်။
ထိုကဲ့သို့ စစ်ကောင်စီက စစ်ကြောင်းထိုးလှုပ်ရှားမှုများကြောင့် မကွေးတိုင်းအတွင်းရှိ ဂန့်ဂေါမြို့နယ်မြောက်ပိုင်းနှင့် စစ်ကိုင်းတိုင်းအတွင်းရှိ ကလေးမြို့နယ်တောင်ပိုင်းတို့တွင်လည်း စစ်ကောင်စီနှင့် ဒေသခံတော်လှန်ရေးတပ်ဖွဲ့များကြား စစ်ရေးတင်းမာလျက်ရှိနေကြောင်း သိရသည်။
လက်ရှိတွင်လည်း ယောဒေသအတွင်း၌ စစ်ကောင်စီက ဖုန်းလိုင်းနှင့် အင်တာနက်လိုင်းများကို ဖြတ်တောက်ထားခြင်း၊ နှေးကွေးအောင်ပြုလုပ်ထားခြင်းတို့အပြင် လေကြောင်းအသုံးပြု၍ ဗုံးကြဲတိုက်ခိုက်မှုများကြောင့် နေအိမ်တိုင်းတွင် ဗုံးခိုကျင်းများ တူးထားကြရန် ဒေသခံ ပြည်သူ့အုပ်ချုပ်ရေးအဖွဲ့(ပအဖ)များက အသိပေးပြောကြားထားသည်။
ပြီးခဲ့သည့် ၂၀၂၅ ခုနှစ်၊ မတ်လ၌ စစ်ကောင်စီ၏ လေကြောင်းတိုက်ခိုက်မှုကြောင့် ယောဒေသအတွင်းရှိ အရပ်သားပြည်သူ ၁၉ ဦး သေဆုံးကာ၊ ၄၀ ဦးရေ ထက်မနည်း ထိခိုက်ဒဏ်ရာများ ရရှိခဲ့သည်။
