By Nway / MPA
မကွေးတိုင်း၊ ဆင်ပေါင်ဝဲမြို့နယ်၊ ကပစ ၁၃ကို ရှေ့တိုက်ဒုံးဖြင့် ပစ်ခတ်ခဲ့ရာ ထိခိုက်မှုများပြားကြောင်းသိရသည်။
ဧပြီ ၂၅ရက်၊ည၁၂နာရီခန့်တွင် ဆင်ပေါင်ဝဲမြို့နယ်ရှိ ကပစ ၁၃ကို ၁၀၇မမ ရှေ့တိုက်ဒုံး ၁၀လုံးဖြင့် ပစ်ခတ်တိုက်ခိုက်ခဲ့ရာ အရေးပါသော Primer (အစပျိုးယမ်း) စက်ရုံအပါအဝင် အခြားစက်ရုံများသို့ ထိမှန်ပေါက်ကွဲခဲ့သည်ဟု ကနဦးစုံစမ်းသိရှိထားကြောင်း Brave Warriors For Myanmar က သတင်းထုတ်ပြန်သည်။
” ၁၀ လုံးစလုံးစက်ရုံထဲကိုကျရောက်ပေါက်ကွဲပါတယ်။ အဓိကစက်ရုံတွေထိတယ်။စကစ စစ်သားတွေလည်းအများအပြားထိတယ်လို့ကနဦးသိရပါတယ်” Brave Warriors For Myanmarမှ တာဝန်ရှိသူတစ်ဦးက MPA သို့ပြောသည်။
စစ်ကောင်စီက ပေါက်ကွဲသံများကို ပြည်သူများမကြားစေရန် လက်နက်ကြီးများ ရမ်းသန်းပစ်ခတ်ပြီး တိုက်ပွဲဖြစ်ပွားနေသယောင် ပြုလုပ်ခဲ့ကြောင်း သိရသည်။
” စကစဘက်ကတော့ထုံးစံအတိုင်းလက်နက်ကြီးနဲ့ပြန်ပစ်ပါတယ်။ ပြီးတော့ ကပစ စက်ရုံတွေ ၁၀၇ နဲ့အပစ်ခံရလို့ထွက်လာတဲ့ပေါက်ကွဲသံတွေကို ပြည်သူတွေမသိအောင် လက်နက်ကြီး ပြန်ရမ်းပစ်နေ ပြီး တိုက်ပွဲဖြစ်လို့ ပေါက်ကွဲသံတွေထွက်နေသယောင် စကစဘက်ကလုပ်နေတယ်လို့လည်းသိရ ပါတယ်” ဟု ၎င်းကဆက်လက်ပြောသည်။
ကပစ ၁၃ သည် အသေးစားကျည်ဆန်မှစ၍ အကြီးစား လေယာဥ် ဗုံးသီးများအထိ ပြုလုပ်ရာ၌ အဓိကသုံးရသော Detonator(စနက်တံ) နှင့် Primer(အစပျိုးယမ်း) များ အဓိက ထုတ်လုပ် ပေးနေသော ကာကွယ်ရေးပစ္စည်းစက်ရုံဖြစ်သည်။
ထို့ကြောင့်ယင်းစက်ရုံပျက်စီးလျှင် ၎င်းကို မှီခို၍ ထုတ်လုပ်နေသည့် ကပစ ၃၊ ကပစ ၅၊ ကပစ ၇၊ ကပစ၁၂၊ ကပစ ၁၅ ၊ ကပစ ၁၇ နှင့် ကပစ ၂၁ တို့ ၏ ထုတ်လုပ်မှုများလည်းထိခိုက်မည်ဖြစ်ကြောင်း BMWကဆိုသည်။
စစ်ကောင်စီတပ်၏ စစ်ရေးအချက်အချာ နေရာများကို ဖြိုခွင်းနိုင်မှသာ နွေဦးတော်လှန်ရေးအောင်မြင်နိုင်မည်ဖြစ်သဖြင့် BWM နှင့် မဟာမိတ် အဖွဲ့များက ကပစ ၁၃ အား BWM Mission 34 အဖြစ် အောင်မြင်စွာတိုက်ခိုက် ဖော်ဆောင်ခဲ့ခြင်းဖြစ်ကြောင်းသိရသည်။
ယင်းတိုက်ခိုက်မှုကို Brave Warriors for Myanmar (BWM) အဖွဲ့၏ ဦးဆောင်မှုဖြင့် Shadow (အညာ) ၊ No More Dictatorship- NMD အဖွဲ့နှင့် Eagle Brigade အဖွဲ့တို့ ပူးပေါင်းဆင်နွှဲခဲ့ခြင်းဖြစ်ကြောင်းသိရသည်။
