By Hsu Yee / MPA
ပဲခူးတိုင်း ၊ ဖြူးမြို့နယ်အတွင်း စစ်ကောင်စီတပ်၏ လေကြောင်းနှင့်လက်နက်ကြီးဖြင့် ပစ်ခတ်ခဲ့ရာ သက်ကြီးရွယ်အို အမျိုးသားတစ်ဦး သေဆုံးခဲ့ပြီး ပြည်သူ လေးဦး ဒဏ်ရာရရှိခဲ့ကြောင်း သိရသည်။
ဧပြီ ၂၄ ရက်၊ ညနေ ၃ နာရီ မိနစ် ၅၀ ခန့်တွင် ဖြူးမြို့နယ်၊ လေးအိမ်စုရွာကို Mi 35 ဖြင့် ငါးကြိမ် နှင့် ၄ နာရီ ၂၅ မိနစ်ခန့်တွင် ဂျက်ဖိုက်တာဖြင့် နှစ်ကြိမ် ဗုံးကြဲတိုက်ခိုက်ခဲ့ပြီး ညနေ ငါးနာရီခန့်တွင် အုတ်ဖြတ်ရွာအခြေစိုက် စစ်ကောင်စီတပ်က လက်နက်ကြီးဖြင့် ထပ်မံပစ်ခတ်ရာ လက်နက်ကြီးစ ထိမှန်မှုကြောင့် လေးအိမ်စုရွာမှ အသက် ၇၂ နှစ်အရွယ်အဘိုးတစ်ဦး သေဆုံးခဲ့ပြီး အမျိုးသမီး တစ်ဦး(စိုးရိမ်ရ)နှင့် အမျိုးသားတစ်ဦး ဒဏ်ရာရရှိခဲ့ကာ ဘွားအေစုရွာမှ အမျိုးသမီးတစ်ဦးနှင့် အမျိုးသားတစ်ဦးလည်း ဒဏ်ရာရရှိခဲ့ကြောင်း ဖြူးမြို့နယ်ရှိ စစ်ရေး သတင်းအရင်းအမြစ်ထံမှ သိရသည်။
“ သူတို့က ရွာထဲနေရင်း အိမ်ထဲမှာပဲ ထိတာ။ လေးအိမ်စုရွာက အိမ်ပေါ်ကိုလည်း လက်နက်ကြီးကျတယ်။ ဘယ်နှစ်အိမ်လောက်ပျက်စီးသွားလဲတော့ အတိအကျမသိရသေးဘူး။ လက်နက်ကြီးကတော့ အုတ်ဖြတ်ဘက်ကပါခင်ဗျ” ဟု ၎င်းက MPA သို့ပြောသည်။
လေးအိမ်စုရွာထဲသို့ လက်နက်ကြီးတစ်လုံးနှင့် ရွာပြင်၌ လက်နက်ကြီး နှစ်လုံး ကျရောက်ပေါက်ကွဲခဲ့ပြီး ပြည်သူများ စစ်ရှောင်နေရကြောင်း ဒေသခံ ပြည်သူတစ်ဦးထံမှ သိရသည်။
“ ရွာကတော့ အိမ်ခြေ ၂၀၀ လောက်ရှိတယ်။ ပြည်သူတွေကတော့ ရှောင်ကုန်ကြပြီ။ လမ်းတွေကတော့ ပိတ်ထားတယ်လို့ကြားတယ် “ ဟု ၎င်းက ပြောသည်။
ဧပြီ ၂၄ ရက်တွင် လေးအိမ်စုနှင့် အောက်ခုံကျေးရွာကြား၌ စစ်တပ်နှင့် PDF တို့ တိုက်ပွဲဖြစ်ပွားခဲ့သော်လည်း တိုက်ပွဲအခြေအနေနှင့် ပတ်သက်၍ သက်ဆိုင်ရာ အဖွဲ့များက ထုတ်ပြန်ထားခြင်း မရှိသေးပေ။
