By Hsu Yee / MPA
ပဲခူးတိုင်း ၊ ကြို့ပင်ကောက်မြို့နယ်တွင် စစ်ကောင်စီတပ် မိုင်းဆွဲပစ်ခတ်ခံရပြီး ၁၀ ဦးထက်မနည်း သေဆုံးခဲ့ကြောင်း သိရသည်။
ဧပြီ ၂၄ ရက်၊ နံနက် ကိုးနာရီဝန်းကျင်တွင် ကြို့ပင်ကောက်မြို့နယ် အရှေ့ဘက်ရှိ အလယ်ကုန်း တိုက်နယ် ရဲစခန်းမှ စစ်သား ၁၅ ဦးခန့် ကြို့ပင်ကောက်မြို့ဘက်သို့ ဦးတည်ထွက်လာစဉ် တောင်ပို့ပြောင်ရွာနှင့် ကြို့ပင်စခန်းရွာကြား၌ PDF တို့ မိုင်းဆွဲတိုက်ခိုက်ခဲ့ပြီး ဆိုင်ကယ်များ လဲကျသွားချိန်၌ လက်နက်ငယ်များနှင့်ပစ်ခတ်ခဲ့ရာ နာရီဝက်ခန့် ထိတွေ့တိုက်ပွဲဖြစ်ပွားခဲ့ကြောင်း BTZM GBK PDF – ပဲခူးရိုးမ အခြေပြုတပ်ဖွဲ့က သတင်းထုတ်ပြန်ထားသည်။
“ အရင်ဆုံးကျွန်တော်တို့ကလက်ဦးမှုရယူပြီး ပစ်တာ စစ်သားတွေ ပြန်မပစ်နိုင်ဘူး။ သူတို့က မြို့ဘက်ကိုနှစ်ရက် တစ်ခါလောက်သွားနေကျ။ လမ်းမှာတွေ့တဲ့ဆိုင်ကယ်တွေဖမ်းတယ်၊ စစ်တယ် ၊ငွေညှစ်တာမျိုးတွေလုပ်တာပါ” ဟု BTZM GBK PDF ပဲခူးရိုးမအခြေပြုတပ်ဖွဲ့ တပ်ဖွဲ့မှူး တေဇမင်းက MPA သို့ပြောသည်။
မိုင်းဆွဲပစ်ခတ်မှုကြောင့် နယ်ထိန်းအပါအဝင် စစ်သား ၁၀ ဦးထက်မနည်း သေဆုံးမှုကို မျက်မြင် တွေ့ရှိခဲ့ပြီး ကျန်စစ်သားများမှာ အနီးရှိ လယ်ကွင်းများသို့ ထွက်ပြေးသွားကြောင်း သေဆုံးအလောင်းနှင့်ဒဏ်ရာရသူများကို တိုက်ပွဲဖြစ်ပြီးနောက် တစ်နာရီခန့်အကြာ၌ ကြို့ပင်ကောက်မြို့ပေါ်ရှိ နာရေးကားသုံးစီးဖြင့် လာသယ်သွားကြောင်း သိရသည်။
” မသေသေးတဲ့ စစ်သားတွေကိုတော့ ရွှေတောင်စစ်ဆေးရုံကိုတင်သွားတယ်လို့သိရတယ်ခင်ဗျ” ဟု ၎င်းက ဆက်လက်ပြောသည်။
အလယ်ကုန်းတိုက်နယ် ရဲစခန်းမှ အင်အား ၂၀ ကျော် စစ်ကူရောက်လာသဖြင့် လက်နက်များ မကောက်ယူဘဲ ပြန်လည် ဆုတ်ခွာခဲ့ရာ ဆုတ်ခွာချိန်ကျမှ ပဲခူးရိုးမအခြေပြုတပ်ဖွဲ့မှ တပ်စိတ်မှူး စွန်ရဲ ကျည်ထိမှန်ကာ ကျဆုံးခဲ့ကြောင်း သိရသည်။
စစ်သားများ သေဆုံး၊ဒဏ်ရာရမှုကို MPA အနေနှင့် သီးခြားအတည်မပြုနိုင်ပေ။
