By Nway /MPA
ရှမ်းပြည်နယ်၊ နောင်ချိုမြို့နယ်တွင် စစ်ကောင်စီတပ်က အဆိပ်ငွေ့ဗုံးနှင့် ဗုံးသီးများကြဲချတိုက်ခိုက်ခဲ့ကြောင်း သိရသည်။
ဧပြီ ၂၄ရက်၊ ညနေ ခြောက်နာရီခွဲခန့်တွင် နောင်ချိုမြို့နယ်၊ ကျောက်ကြမ်းကျေးရွာအနီး၌ တိုက်ပွဲဖြစ်ပွားခြင်းမရှိဘဲ Y-12 လေယာဉ်ဖြင့် ဗုံးသီး ၂၇လုံးကြဲချတိုက်ခိုက်ခဲ့ပြီး ည ခုနှစ်နာရီခွဲခန့်တွင်လည်း တိုက်ပွဲဖြစ်ပွားနေသည့် အုမ္မတီးကျေးရွာအနီး၌ အဆိပ်ငွေ့ဗုံး ရှစ်လုံးကြဲချတိုက်ခိုက်ခဲ့ကြောင်း TNLA ကသတင်းထုတ်ပြန်သည်။
“မူဆယ်ကနေ မန္တလေးအထိ ကုန်သွယ်ရေးလမ်းကြောင်း ရှင်းလင်းရေးအတွက် ဘယ်လို စစ်ရာဇဝတ်မှုမျိုးမဆို ကျူးလွန်မယ်လို့ စစ်တပ်က ပိုင်းဖြတ်ထားပုံရတယ်။စစ်တပ်က ဘာလုပ် လုပ် တရုတ်ကနေ ထောက်ခံမှုအပြည့်ပေးထားတာ အားလုံးမျက်မြင်ပဲ။ နိုင်ငံတကာကလည်း စစ်တပ် ဘာလုပ်လုပ် မမြင်ချင်ယောင်ဆောင်နေတာကိုး”ဟု ရှမ်းမန်းအခြေစိုက် တော်လှန်ရေးရဲဘော်တစ်ဦး ကMPAသို့ပြောသည်။
စစ်ကောင်စီတပ်သည် အပစ်ရပ်စဲရေးသက်တမ်းကို ဧပြီကုန်အထိ ထပ်မံတိုးထားသော်လည်း ပလောင်ပြည်နယ်လွတ်မြောက်ရေးတပ်ဦး PSLF/TNLA အုပ်ချုပ်သော မြို့နယ်များသို့ စစ်အင်အား ဖြည့်တင်းခြင်း၊ ထိုးစစ်ဆင်ခြင်းနှင့် တိုက်ပွဲဖြစ်ပွားခြင်းမရှိသည့်နေရာများကိုပါ လေကြောင်းမှ ဗုံးကြဲတိုက်ခိုက်ခြင်းတို့ ပြုလုပ်လျက်ရှိကြောင်း TNLA ကထုတ်ပြန်ထားသည်။
ညီနောင်မဟာမိတ်သုံးဖွဲ့က စစ်ကောင်စီတပ်နှင့် တိုက်ပွဲဖြစ်ပွားလျက်ရှိသောနေရာများ၌ ခုခံကာကွယ်သည့် တုံ့ပြန်မှုမှလွဲ၍ စတင်ထိုးစစ်ဆင်တိုက်ခိုက်မည်မဟုတ်ဘဲ ဧပြီ တစ်ရက်မှ ၃၀ရက်အထိ တစ်လတာ တစ်ဖက်သက်အပစ်အခတ်ရပ်စဲကြောင်း ထုတ်ပြန်ထားသည်။
