By Nway / MPA
မကွေးတိုင်း၊ စေတုတ္တရာမြို့နယ်တွင် စစ်တပ်က လေကြောင်းမှ ဗုံးကြဲတိုက်ခိုက်မှုကြောင့် နေအိမ် အလုံး ၅၀ ခန့် မီးလောင်ပြာကျခဲ့ပြီး ပြည်သူ ၃၀၀၀ ကျော် တိမ်းရှောင်နေရကြောင်း သိရသည်။
ဧပြီ ၂၄ ရက်၊ ည ခုနှစ်နာရီခန့်တွင် စေတုတ္တရာမြို့နယ်၊ လုံးဇွန်ကျေးရွာကို စစ်တပ်က ဂျက်ဖိုက်တာ ဖြင့် အကြောင်းမဲ့ ဗုံးနှစ်လုံးကြဲချခဲ့ကြောင်း စေတုတ္တရာမြို့နယ်ပြည်သူ့အုပ်ချုပ်ရေးအဖွဲ့ထံမှ သိရသည်။
” လုံးဇွန်ရွာကို တိုက်ခိုက်ခဲ့တာပါ။ ဗုံးနှစ်လုံးကြဲသွားတယ်။ ဘာအမျိုးအစားလဲတော့ မပြောတတ် ဘူးဗျ။ နေအိမ်၅၀လောက် မီးလောင်ပျက်စီးသွားတယ်။ ပြည်သူ သေဆုံးမှုရှိတယ်လို့တော့ မကြားရသေးဘူး ” ဟု စေတုတ္တရာမြို့နယ်ပြည်သူ့အုပ်ချုပ်ရေးအဖွဲ့မှ တာဝန်ရှိသူတစ်ဦးက MPA ကို ပြောသည်။
ယင်းလေကြောင်းတိုက်ခိုက်မှုကြောင့် လုံးဇွန်ကျေးရွာအပါအဝင် ကျေးရွာခြောက်ရွာမှ ပြည်သူများ ဘေးလွတ်ရာသို့ ထွက်ပြေးတိမ်းရှောင်နေရကြောင်း သိရသည်။
” တောထဲမှာပဲရှောင်နေကြရပါတယ်။ နေထိုင်စားသောက်မှုအခက်အခဲဖြစ်နေတယ်။ အချိန်ဘယ် လောက်ကြာကြာရှောင်ရမလဲမသိသေးတော့ တချို့အခက်အခဲတွေက ပြောမရသေးဘူးဖြစ်နေပါတယ် ” ဟု ၎င်းက ဆက်လက်ပြောသည်။
စေတုတ္တရာမြို့နယ်တည်ရှိသည့် မကွေးတိုင်း၊ မင်းဘူးခရိုင်ထဲတွင် စစ်တပ်က လေကြောင်းတိုက်ခိုက်မှု အကြိမ်ရေများလာသောကြောင့် ဗုံးခိုကျင်းများတူးကြရန် ဆော်ဩထားကြောင်း ၎င်းကပြောသည်။
စေတုတ္တရာမြို့နယ်အတွင်း၌ လေကြောင်းရန်ကာကွယ်ရေးနှင့် မိုင်းအန္တရာယ်ဟောပြောပို့ချမှုများကို မြို့နယ်လူသားစာနာအဖွဲ့က ပြုလုပ်ထားကြောင်း သိရသည်။
