By Ra Wai / MPA
စစ်ကောင်စီ ကြေညာထားသည့် အပစ်ခတ်ရပ်စဲထားသည့် ကာလအတွင်း ရခိုင်ပြည်နယ်၌ စစ်တပ်က စစ်ရေးတိုက်ခိုက်မှု ၄၀၉ ကြိမ်ပြုလုပ်ခဲ့ကြောင်းသိရသည်။
စစ်ကောင်စီတပ်သည် ၎င်းတို့ကြေညာထားသည့် အပစ်အခတ်ရပ်စဲရေးကြေညာချက်ကို လေးစားခြင်းမရှိဘဲ ဧပြီနှစ်ရက်မှ ၂၂ရက်အတွင်း ရခိုင်ပြည်နယ်၊ ကျောက်ဖြူ၊ တောင်ကုတ်၊ ကျောက်တော်၊ စစ်တွေနှင့် ပေါက်တောတို့တွင် ပစ်ခတ်တိုက်ခိုက်မှု ၄၀၉ ကြိမ်ပြုလုပ်ခဲ့ကြောင်း ရက္ခိုင်အမျိုးသားအဖွဲ့ချုပ်၊ လူသားချင်းစာနာထောက်ထားရေးနှင့် ဖွံ့ဖြိုးရေးဆိုင်ရာ ပူးပေါင်းဆောင်ရွက်ရေးရုံးက သတင်းထုတ်ပြန်သည်။
“အပစ်ရပ်ကြေညာပြီးမှ တစ်နိုင်ငံလုံးပတ်ပြီး တိုက်ခိုက်နေတာ အားလုံးမျက်မြင်ပါပဲ။စစ်ကောင်စီမှာ နိုင်ငံရေးသိက္ခာ ငါးပြားတစ်စေ့တောင် မရှိကြောင်း ဖော်ပြလိုက်တာပဲ။ပြဿနာက အခုလို တိုက်ခိုက် နေတာကို နိုင်ငံတကာအသိုင်းအဝိုင်းက ငုတ်တုတ်ထိုင်ကြည့်နေကြတာပဲ”ဟု မုံရွာအခြေစိုက် နိုင်ငံ ရေးတက်ကြွလှုပ်ရှားသူတစ်ဦးက MPA သို့ပြောသည်။
ပစ်ခတ်တိုက်မှုအမျိုးအစားများမှာတိုက်လေယာဉ်များဖြင့် လေကြောင်းတိုက်ခိုက်ခြင်း၊ ဒရုန်းဖြင့် တိုက်ခိုက်ခြင်း၊ စက်တပ်လေထီးဖြင့် တိုက်ခိုက်ခြင်း၊ ရေတပ်သင်္ဘောများမှ ပစ်ခတ်ခြင်းနှင့် လက်နက်ကြီးဖြင့် ပစ်ခတ်ခြင်းတို့ဖြစ်ကြောင်း သိရသည်။
ယင်းတိုက်ခိုက်မှုများကြောင့် အရပ်သား တစ်ဦး သေဆုံးပြီး၊ ၂၈ ဦး ဒဏ်ရာရရှိခဲ့ကာ ဒဏ်ရာရသူများအနက် ငါးဦးမှာ အသက် ၅ နှစ်မှ ၁၄ နှစ်ကြားရှိ ကလေးများဖြစ်ကြောင်း သိရသည်။
ထို့ပြင် အိမ် ၂၁ လုံး၊ ဆိုင် နှစ်ဆိုင်နှင့် ဘာသာရေးအဆောက်အအုံ တစ်လုံးအပါအဝင် အဆောက်အအုံများလည်း ထိခိုက်ပျက်စီးခဲ့ကြောင်းသိရသည်။
မတ်လ ၂၈ ရက်က လှုပ်ခတ်ခဲ့သည့် ဖျက်အားပြင်းငလျင်ကြောင့် ကယ်ဆယ်ရေးနှင့် ပြန်လည်ထူထောင်ရေးလုပ်ငန်းများကို အရှိန်မြှင့်ဆောင်ရွက်နိုင်ရန်နှင့်တည်ငြိမ်အေးချမ်းမှုကို ရှေးရှုကာ ဧပြီ နှစ်ရက်ကနေ ၂၂ ရက်နေ့အထိ နိုင်ငံတစ်ဝန်း ယာယီအပစ်ရပ်ကြောင်း စစ်ကောင်စီက ပထမအကြိမ်ထုတ်ပြန်ပြီးနောက် ဧပြီ ၂၃ ရက်မှ ၃၀ ရက်အထိ ထပ်မံသက်တမ်းတိုးကြောင်း ကြေညာထားသည်။
ညီနောင်မဟာမိတ်သုံးဖွဲ့ကလည်း စစ်ကောင်စီတပ်နှင့် တိုက်ပွဲဖြစ်ပွားလျက်ရှိသောနေရာများ၌ ခုခံကာကွယ်သည့်တုံ့ပြန်မှုမှလွဲ၍ စတင်ထိုးစစ်ဆင်တိုက်ခိုက်မည်မဟုတ်ဘဲ ဧပြီ တစ်ရက်မှ ၃၀ ရက်အထိ တစ်လတာ တစ်ဖက်သက်အပစ်အခတ်ရပ်စဲကြောင်း ထုတ်ပြန်ထားသည်။
