By Bala / MPA
ကရင်နီပြည်နယ်၊ ဖားဆောင်းမြို့နယ်၊ မော်ချီးဒေသရှိ ခဲခါစက်ရုံကို စစ်ကောင်စီက ဂျက်ဖိုက်တာ အသုံးပြုပြီး ပေါင် ၅၀၀ ဗုံးတစ်လုံးကြဲချခဲ့ကြောင်း ဒေသခံများထံမှ စုံစမ်းသိရှိရသည်။
ယနေ့(ဧပြီ ၂၄ ရက်)၊ မွန်းလွဲ သုံးနာရီကျော်တွင် စစ်ကောင်စီက အထက်ပါနေရာကို ဗုံးကြဲတိုက်ခိုက်ခဲ့ခြင်းဖြစ်ပြီး ပြည်သူ ၁၀ဦးခန့် သေဆုံးခဲ့ရကြောင်း မော်ချီးဒေသခံတစ်ဦးက ပြောသည်။
“ သုံးနာရီကျော်လောက်မှာ လာကြဲသွားတာ၊ အမှတ် ၂ နားက တရုတ်စက်ရုံနားကို ကျသွားတယ်။ ခဲခါစက်ရုံနားကိုကျသွားတာပါ၊ အဲ့ဒီမှာက ပုံမှန်ဆို လူသုံးလေးဆယ်ရှိတယ်။ ခဲလာဆေးကြတာကို ” ဟု ၎င်းက ပြောသည်။
အဆိုပါ လေကြောင်းတိုက်ခိုက်ခံရမှုနှင့် ပတ်သက်ပြီး မော်ချီးဒေသရှိ စစ်ရေးသတင်းရင်းမြစ်အား မေးမြန်းရာ ဖြစ်စဉ်မှာ ဟုတ်မှန်ကြောင်းနှင့် သေဆုံးထိခိုက်ဒဏ်ရာရရှိသူ စာရင်းအတိအကျ မသိရသေးကြောင်း ပြောသည်။
“ ဂျက်က မနက်ထဲကဝဲနေတာ၊ ခနဝဲပြီး ပြန်ထွက်သွားတော့ နေ့လယ်လာဝဲတော့လဲ လူတွေက ပုံမှန်အတိုင်းပဲထင်လိုက်တာ၊ အဲ့ဒီနားက လူများတဲ့နေရာပေါ့၊ ခဲဆေးတဲ့နေရာဆိုတော့ အလုပ်သမားတွေ၊ ကလေးတွေရှိတယ်။ သေတဲ့အထဲမှာဆို လသားအရွယ် ကလေးတစ်ဦး ခေါင်းပြတ်သွားတယ်။ သေတဲ့စာရင်းအတိအကျကိုတော့ မရသေးဘူး။ တရုတ်(မြန်မာပြည်ဖွား တရုတ်လူမျိုးများ)တွေလဲ ပေါင် ၅၀၀ထိပြီးသေတယ်။ ကျတာက တရုတ်စက်ရုံနားဆိုတော့လေ” ဟု ၎င်းက ပြောသည်။
ပြီးခဲ့သည့် မတ် ခုနှစ်ရက်ကလည်း စစ်ကောင်စီက မော်ချီးမြို့တစ်နေရာသို့ လေကြောင်းဖြင့် ဗုံးကြဲတိုက်ခိုက်ခဲ့ရာ ပြည်သူ နှစ်ဦးသေဆုံးပြီး ၁၀ဦးထက်မနည်း ထိခိုက်ဒဏ်ရာရရှိခဲ့သေးသည်။
ထိုကဲ့သို့ စစ်ကောင်စီက ကရင်နီပြည်နယ်အတွင်း မကြာခဏ လေကြောင်းတိုက်ခိုက်မှုများပြုလုပ်နေခြင်းကြောင့် ပြည်သူများအနေဖြင့် ဗုံးခိုကျင်းများ ကြိုတင်တူးထားကြရန် Karenni National Solidarity Organization (ကြယ်ဖြူ)တပ်ဖွဲ့က မတ် ၁၀ရက်တွင် အသိပေးထုတ်ပြန်ခဲ့သေးသည်။
လက်ရှိ စစ်ကောင်စီတပ်သည် ရှမ်း-ကရင်နီနယ်စပ်ရှိ မိုးဗြဲမြို့နယ်အား ဝင်ရောက်နိုင်ရန်အတွက် နေ့စဉ်နီးပါး ထိုးစစ်ပြုလုပ်နေသည့်အပြင် လက်နက်ကြီးများ၊ ဒရုန်းများနှင့် လေကြောင်းတိုက်ခိုက်မှုများကို ပိုမိုပြုလုပ်လျက်ရှိကြောင်း ကရင်နီအမျိုးသားကာကွယ်ရေးတပ်-KNDF ဗဟို သတင်းနှင့်ပြန်ကြားရေးဌာနမှ ထုတ်ပြန်ထားသည်။
