By Hsu Yee / MPA
ပဲခူးတိုင်း ၊ ထန်းတပင်မြို့နယ်တွင် စစ်တပ် ပစ်ခတ်သည့် လက်နက်ကြီးကျည် ထိမှန်ကာ အသက် ၇၀ ကျော်အရွယ်ရှိ အမျိုးသမီးတစ်ဦးသေဆုံးကာ ကလေးငယ်တစ်ဦး အပါအဝင် သုံးဦး စိုးရိမ်ရဒဏ်ရာရရှိခဲ့ကြောင်း သိရသည်။
ဧပြီ ၂၄ ရက်၊ နံနက် တစ်နာရီကျော်တွင် ညောင်ခြေထောက် တပ်စခန်းနှင့် ဇရပ်ကြီးမြို့အခြေစိုက် ခလရ ၇၃ မှ လက်နက်ကြီး ၁၀ လုံးကျော် ပစ်ခတ်ခဲ့ရာ သောင်ပုချောင်ကျေးရွာအတွင်းသို့ နှစ်လုံးကျရောက် ပေါက်ကွဲခဲ့ပြီး နေအိမ်အတွင်းရှိ ပြည်သူများထိမှန်ခဲ့ခြင်းဖြစ်ကြောင်း တောင်ငူခရိုင် အမှတ် နှစ်တပ်ရင်း P2-3502 မှသတင်းထုတ်ပြန်သည်။
“ တိုက်ပွဲဖော်ဆောင်ခြင်း ဖြစ်ပွားခြင်းမရှိပါဘူး။ ဘယ်ကိုဦးတည်တာလဲဆိုတော့ အမြဲတမ်း စစ်တောင်းကမ်းပါးဘေးကရွာတွေကို PDF တွေကိုထောက်ပံ့တယ်ဆိုပြီး လှမ်းလှမ်းပစ်တယ်ဗျ” ဟု တောင်ငူခရိုင် အမှတ်နှစ်တပ်ရင်း P2-3502 မှ တာဝန်ရှိသူတစ်ဦးက MPAသို့ပြောသည်။
စိုးရိမ်ရဒဏ်ရာရရှိသူများမှာ အသက် ရှစ်နှစ်အရွယ်ကလေးငယ်တစ်ဦး ၊ အသက် ၅၀ခန့်ရှိ အမျိုးသားတစ်ဦးနှင့် အသက် ၅၀ ခန့်ရှိ အမျိုးသမီးတစ်ဦးတို့ဖြစ်ပြီး အသက် ၄၀ ခန့်ရှိ အမျိုးသား တစ်ဦးမှာ မျက်နှာထိမှန်ကာ မစိုးရိမ်ရဒဏ်ရာရခဲ့ကြောင်း သိရသည်။
” ရွာလုံးကျွတ်ရှောင်တာမျိုးမဟုတ်ပေမယ့် ရှောင်နေကြတာမျိုးလည်း ရှိတယ်။အဲ့ရွာထဲကပဲ အိမ်နှစ်လုံး ထိပြီးပျက်စီးတာလည်းရှိတယ်” ဟု ၎င်းက ဆက်လက်ပြောသည်။
ကျန်လက်နက်ကြီးကျည်များမှာ ရွာဘေးပတ်လည်နှင့် စစ်တောင်းမြစ်ထဲသို့ ကျသွားကြောင်း သိရသည်။
လှေဆွဲမြောင်းရွာ၊ သောင်ပုချောင်ရွာ၊ နှောခင်ရွာနှင့် ထန်းကုန်းရွာမှ ပြည်သူအချို့ အနီးအနားရှိ လယ်တောများသို့ တိမ်းရှောင်နေကြကြောင်းလည်း သိရသည်။
