By Ra Wai / MPA
မကွေးတိုင်း၊ ပခုက္ကူမြို့နယ်အတွင်းရှိ ကျေးရွာနှစ်ရွာကို စစ်တပ်က ဗုံးကြဲတိုက်ခိုက်ခဲ့ရာ နွားစာကျွေးနေသည့် အမျိုးသမီးတစ်ဦးသေဆုံးခဲ့ကြောင်း သိရသည်။
ဧပြီ ၂၃ ရက်၊ ညနေ လေးနာရီခွဲခန့်တွင် ပခုက္ကူမြို့နယ်၊ ရွာသစ်စုရွာကို ဂျက်ဖိုက်တာဖြင့် ဗုံးနှစ် ကြိမ်ကြဲချကာ စက်လတ်ဖြင့်လည်းပစ်ခတ်ခဲ့ပြီး ဆယ်ပင်စုရွာကိုလည်း ဗုံးသုံးကြိမ်ကြဲချခဲ့ရာ ဆယ်ပင်စုရွာမှ အမျိုးသမီးတစ်ဦးသေဆုံးပြီး၊ အမျိုးသားနှစ်ဦးဒဏ်ရာရကာ ရွာသစ်စုရွာမှလည်း အမျိုးသားနှစ်ဦး ဒဏ်ရာရရှိခဲ့ကြောင်း ဒဏ်ရာသူများမှာ မစိုးရိမ်ရကြောင်း ကမ္မတိုက်နယ်ပကဖထံမှသိရသည်။
” ရွာထဲကို ဦးတည်ပြီး ကြဲတာဆိုတော့ အိမ်ထဲနေရင်းပါ။ သေဆုံးတဲ့အမျိုးသမီးက နွားစာကျွေးနေရင်း ထိမှန်သေဆုံးတာပါ။ ခြေထောက်ထိတဲ့သူ ထိပြီး ခါးထိတဲ့သူ ထိပါတယ်။” ဟု ကမ္မတိုက်နယ်ပကဖမှ အဖွဲ့ဝင်တစ်ဦးက MPA သို့ပြောသည်။
ယင်းလေကြောင်းတိုက်ခိုက်မှုကြောင့် ရွာသစ်စုရွာမှ နေအိမ်နှစ်လုံးမီးလောင်ပျက်စီးပြီး ဆယ်ပင်စုရွာမှ နေအိမ်တစ်လုံးပျက်စီး၍ နွားနှစ်ကောင်ထိမှန်ခဲ့ကြောင်း သိရသည်။
ငလျင်ဒဏ်သင့်ဒေသများတွင် ပြန်လည်ထူထောင်ရေးလုပ်ငန်းများ အရှိန်အဟုန်ဖြင့် လုပ်ဆောင်နိုင်ရန်အတွက် ယာယီအပစ်ခတ်ရပ်စဲရေးကို ဧပြီ ၂၃ ရက်မှ ၃၀ ရက်အထိ တိုးမြှင့်ကြောင်း စစ်ကောင်စီတပ်က ကြေညာထားသော်လည်း နိုင်ငံတစ်ဝန်း လေကြောင်းမှ ဗုံးကြဲမှုများကို ဆက်လက်လုပ်ဆောင်လျက်ရှိသည်။
