By Nway / MPA
စစ်ကိုင်းတိုင်း၊ ဒီပဲယင်းမြို့နယ်တွင် စစ်တပ်ကြဲချသည့်ဗုံး ထိမှန်ကာအမျိုးသမီးသုံးဦးအပါအဝင် ပြည်သူငါးဦး သေဆုံးကြောင်းသိရသည်။
ယနေ့ (ဧပြီ ၂၃ ရက်) နံနက် ၁၁ နာရီ မိနစ် ၄၀ ခန့်တွင် ဒီပဲယင်းမြို့နယ်၊ လက်လှုပ်ကျေးရွာသို့ စစ်ကောင်စီတပ်က လေကြောင်းမှ ဗုံးနှစ်လုံးကြဲချတိုက်ခိုက်ခဲ့ရာ ခုနှစ်ဦးထက်မနည်းလည်း ဒဏ်ရာရရှိခဲ့ကြောင်း ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့ထံမှ သိရသည်။
” အိမ်ထဲမှာရှိတဲ့အချိန်တွေမှာ ဖြစ်သွားတာပါ။ အိမ်နီးချင်းပြည်သူတွေ ထိခိုက်ရတာပါ။ ထိခိုက် ဒဏ်ရာရရှိတဲ့သူတွေထဲက တချို့က စိုးရိမ်ရပါတယ်” ဟု ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့မှ တာဝန်ရှိသူတစ်ဦးက MPA သို့ပြောသည်။
ဗုံးကြဲတိုက်ခိုက်မှုကြောင့် အဆောက်အအုံနှစ်လုံးပျက်စီးပြီး ရွာခံပြည်သူများလည်း ကြောက်လန့်ကာ ထွက်ပြေးတိမ်းရှောင်နေရကြောင်း သိရသည်။
ငလျင်ဒဏ်သင့်ဒေသများတွင် ပြန်လည်ထူထောင်ရေးလုပ်ငန်းများ အရှိန်အဟုန်ဖြင့် လုပ်ဆောင်နိုင်ရန်အတွက် ယာယီအပစ်ခတ်ရပ်စဲရေးကို ဧပြီ ၂၃ ရက်မှ ၃၀ ရက်အထိ တိုးမြှင့်ကြောင်း စစ်ကောင်စီတပ်က ကြေညာထားသော်လည်း နိုင်ငံတဝန်း လေကြောင်းမှ ဗုံးကြဲမှုများကို ဆက်လက်လုပ်ဆောင်လျက်ရှိသည်။
