By Ra Wai / MPA
ပဲခူးတိုင်း၊ ညောင်လေးပင်မြို့နယ်တွင် စစ်သားတစ်ဦး PDF စနိုက်ပါ ကျည်ထိမှန်ကာ သေဆုံးခဲ့ကြောင်းသိရသည်။
ဧပြီ ၂၁ရက်၊ ညနေ သုံးနာရီခွဲဝန်းကျင်တွင် ညောင်လေးပင်မြို့နယ်၊ ပုစွန်မြောင်းကျေးရွာသို့ ရောက်ရှိနေသည့် စစ်ကောင်စီတပ်ကို လက်နက်ကြီးနှင့် ပစ်ခတ်တိုက်ခိုက်ပြီးနောက် မဒေါက်-ညောင်လေးပင်လမ်းပေါ်ရှိ တာပြတ်တံတားမှထွက်ပြေးလာသည့် စစ်သားတစ်ဦးကို စနိုက်ပါဖြင့် ပစ်ခတ်တိုက်ခိုက်ခဲ့ကြောင်း မီးနဂါးစစ်ကြောင်း (Fire Dragon ) က သတင်းထုတ်ပြန်သည်။
” လက်နက်ကြီးပစ်လို့ပြေးထွက်တာ။ စနိုက်ပါနဲ့ ထိတဲ့တစ်ယောက်တော့သေချာတယ်။ သူတို့စခန်းဝမှာပဲသေတာ” ဟုမီးနဂါးစစ်ကြောင်းမှ ရဲဘော်တစ်ဦးက MPA သို့ပြောသည်။
စနိုက်ပါနှင့် မပစ်ခင် ပုစွန်မြောင်းကျေးရွာအတွင်းမှ ဒရုန်းတက်သည့်နေရာသို့ ၆၀မမနှစ်လုံးနှင့် တာပြတ်တံတားသို့ ၆၀မမ နှစ်လုံး ပစ်ခတ်ခဲ့ရာ ထိခိုက်မှုကိုမူ မသိရှိရသေးပေ။
ထို့နောက် ညနေငါးနာရီဝန်းကျင်၌လည်း တာပြတ်တံတားကို ၆၀မမတစ်လုံးဖြင့် ထပ်မံပစ်ခတ်ခဲ့ သေးကြောင်းသိရသည်။
” စစ်ကြောင်းက ပုစွန်မြောင်းထဲမှာ ၇၀လောက်ရှိတယ်။ သုံးနေရာခွဲနေတယ်။ တာပြတ်ကရွာပြင်မှာ။ တာပြတ်မှာ ၁၅နဲ့၂၀ကြားရှိတယ်” ဟု ၎င်းက ဆက်လက်ပြောသည်။
ယင်းသို့သော PDFတို့၏ တိုက်ခိုက်မှုကို ညောင်လေးပင်မြို့၊ ခမရ ၂၀မှ ၁၂၀မမဖြင့်ပြန်လည်ပစ်ခတ်ပြီး ပိန်းဇလုပ် အခြေစိုက် ခလရ ၂၆၄ တပ် မှလည်း ဟောင်ဝှစ်ဇာဖြင့်ပစ်ခတ်ခဲ့သည့်အပြင် PDFရဲဘော်များရှိနိုင်သည့် နေရာများသို့လည်း ဒရုန်းဖြင့် ဗုံးလိုက်ကြဲသေးကြောင်း သိရသည်။
ဧပြီ ၂၀ရက်ကလည်း ယင်းစစ်ကြောင်းနှင့် မီးနဂါးစစ်ကြောင်းတို့ ထိတွေ့တိုက်ပွဲဖြစ်ပွားခဲ့ရာ စစ်တပ် အရာရှိတစ်ဦး အပါအဝင်သုံးဦးသေဆုံးကာ ငါးဦးထက်မနည်းဒဏ်ရာရရှိခဲ့ကြောင်း မီးနဂါးစစ်ကြောင်းက သတင်းထုတ်ပြန်ထားသည်။
စစ်သား သေဆုံးမှုကို MPA အနေနှင့် သီးခြားအတည်မပြုနိုင်ပေ။
