By Ra Wai / MPA
မန္တလေးတိုင်း၊ စဉ့်ကူးမြို့နယ်ကို စစ်တပ်က လေကြောင်းတိုက်ခိုက်မှု ထပ်မံ ပြုလုပ်ခဲ့ရာ ငါးလသားအရွယ်ကလေးငယ်တစ်ဦးအပါအဝင် မိသားစုဝင်လေးဦး ဒဏ်ရာရရှိခဲ့ကြောင်းသိရသည်။
ဧပြီ ၂၁ရက်၊ ညနေ သုံးနာရီခွဲခန့်တွင် စဉ့်ကူးမြို့နယ်၊ အောက်ဇီးကုန်းကျေးရွာကို စစ်ကောင်စီတပ်က ဗုံးကြဲတိုက်ခိုက်သဖြင့် ငါးလသားအရွယ်ကလေးငယ် (ကျား)တစ်ဦး၊ အမျိုးသားတစ်ဦးနှင့် အမျိုးသမီးတစ်ဦး ဒဏ်ရာရရှိပြီး အသက် ၆၀ အရွယ်အမျိုးသမီးတစ်ဦး ပြင်းထန်ဒဏ်ရာရရှိခဲ့ကြောင်း ပြင်ဦးလွင်ခရိုင်ပကဖထံမှသိရသည်။
” တစ်လုံးတည်းကြဲတယ်လို့ပဲသိရတယ်ဗျ။ ထိုင်နေရင်းပဲဖြစ်မှာပေါ့။ ဘာလို့ဆို လေးယောက်စလုံးက မိသားစုဝင်တွေချည်းပဲ။ သုံးယောက်ကတော့ စိုးရိမ်ဒဏ်ရာမရှိဘူးဗျ” ဟု ပြင်ဦးလွင်ခရိုင်ပကဖမှ သတင်းနှင့်ပြန်ကြားရေးတာဝန်ခံက MPA သို့ပြောသည်။
ယင်းဗုံးကြဲတိုက်ခိုက်မှုကြောင့် နေအိမ်သုံးလုံးပျက်စီးပြီး နွားတစ်ကောင်နှင့် ဝက်လေးကောင် သေဆုံးခဲ့ကြောင်းသိရသည်။
ဧပြီ ၂၀ရက်၊ ည ၁၀နာရီခန့်ကလည်း စဉ့်ကူးမြို့အဝင် တံတားအနီးလေကြောင်းတိုက်ခိုက် မှုပြုလုပ်ခဲ့ရာ လူထိခိုက်မှုမရှိခဲ့ကြောင်း သိရသည်။
ငလျင်ဘေးကယ်ဆယ်ရေးနှင့် ပြန်လည်ထူထောင်ရေးလုပ်ငန်းများကို အရှိန်မြှင့်ဆောင်ရွက်နိုင်ရန်နှင့်တည်ငြိမ်အေးချမ်းမှုကို ရှေးရှုကာ ဧပြီ ၂ ရက်မှဧပြီ ၂၂ ရက်အထိ နိုင်ငံတစ်ဝန်း ယာယီအပစ်ရပ်ကြောင်း စစ်ကောင်စီက ထုတ်ပြန်ပြီးနောက် နိုင်ငံတစ်ဝန်း လေကြောင်းမှ ဗုံးကြဲတိုက်ခိုက်မှုများကို စစ်တပ်က ဆက်တိုက်လုပ်ဆောင်လျက်ရှိသည်။
၂၀၂၄ ခုနှစ်၊ ဇူလိုင် ၁၇ ရက်ကတည်းက စဉ့်ကူးမြို့နယ်တစ်ခုလုံးကို တော်လှန်ရေးအင်အားစုတို့က သိမ်းပိုက်ထားခဲ့ပြီး ယခုထိတိုင် စစ်ကောင်စီကင်းစင်နေသော မြို့ဖြစ်သည်။
