By Ra Wai / MPA
စစ်ကိုင်းတိုင်း၊ မြင်းမူမြို့နယ်တွင် စစ်ကောင်စီတပ်၏ လေကြောင်းတိုက်ခိုက်မှုကြောင့် စစ်ရှောင်အမျိုးသမီးတစ်ဦးအပါအဝင် ခြောက်ဦးသေဆုံးပြီး ၁၅ ဦးဒဏ်ရာရရှိခဲ့ကြောင်းသိရသည်။
ဧပြီ ၁၉ ရက်၊ နေ့ခင်း ၁၁ နာရီ မိနစ် ၄၀ ခန့်တွင် မြင်းမူမြို့နယ်၊ ကန်တော်ရွာ စစ်ရှောင်တောတိုက် ထဲသို့ စစ်ကောင်စီတပ်က ဂျက်ဖိုက်တာဖြင့် လေကြောင်း တိုက်ခိုက်မှုပြုလုပ်ခဲ့ကြောင်း မြင်းမူမြို့နယ်သတင်းမှန်ပြန်ကြားရေးအဖွဲ့ထံမှသိရသည်။
” ရော့ကတ်နဲ့ပစ်တယ်၊ ဗုံးကြဲတယ်ဗျ။ ကန်တော်ကျေးရွာကို ၂၀၂၂ ခုနှစ်က စကစတွေက မီးရှို့ ထားတော့၊ စစ်ဘေးရှောင်ရင်း တောထဲမှာနေကြတဲ့ တဲတစ်ဝိုက်ကို ထိတာဗျ” ဟု မြင်းမူမြို့နယ်သတင်းမှန်ပြန်ကြားရေးအဖွဲ့မှ တာဝန်ရှိသူတစ်ဦးက MPA သို့ပြောသည်။
ဗုံးကြဲတိုက်ခိုက်မှုကြောင့် စစ်ရှောင်တဲအချို့ပျက်စီးပြီး ဒဏ်ရာရသည့် ၁၃ ဦးထဲတွင် စိုးရိမ်ရသူများ လည်း ရှိကြောင်းသိရသည်။
” ထိခိုက်ဒဏ်ရာရတွေထဲမှာ အမျိုးသမီးလည်းပါတယ်။ကလေးငယ်တွေလည်းပါတယ်ဗျ။ စိုးရိမ်ရတဲ့သူတွေလည်းရှိသေးတယ်ဗျ” ဟု ၎င်းက ဆက်လက်ပြောသည်။
ဒဏ်ရာရသူများကို ဆေးကုသမှုပေးနေသည့် အခြေအနေနှင့် စစ်ဘေးရှောင်တို့၏ လတ်တလောအခြေအနေများကိုမူ လုံခြုံရေးအရ ထုတ်ဖော်ပြောကြားခြင်းမရှိပေ။
ငလျင်ဘေးကယ်ဆယ်ရေးနှင့် ပြန်လည်ထူထောင်ရေးလုပ်ငန်းများကို အရှိန်မြှင့်ဆောင်ရွက်နိုင်ရန်နှင့်တည်ငြိမ်အေးချမ်းမှုကို ရှေးရှုကာ ဧပြီ ၂ ရက်ကနေ ၂၂ ရက်နေ့အထိ နိုင်ငံတစ်ဝန်း ယာယီအပစ်ရပ်ကြောင်း စစ်ကောင်စီက ထုတ်ပြန်ပြီးနောက် နိုင်ငံတစ်ဝန်း လေကြောင်းမှ ဗုံးကြဲတိုက်ခိုက်မှုများကို စစ်တပ်က လုပ်ဆောင်လျက်ရှိသည်။
