By Ko Paing / MPA
မကွေးတိုင်း၊ စလင်းမြို့နယ် တောတွင်းတစ်နေရာတွင် စစ်တပ်ထဲမှ ထွက်ပြေးလာပြီး မိုင်းထိသေဆုံး နေသည့် စစ်သားတစ်ဦးအလောင်းကို PDF တို့ တွေ့ရှိပြီးနောက် မီးသင်္ဂြိုဟ်ပေးခဲ့ကြောင်း သိရသည်။
သေဆုံးနေသူမှာ ပခုက္ကူအခြေစိုက် တပ်မ ၁၀၁ လက်အောက်ခံ ခလရ ၂၃၅ မှ အသက် ၃၀ ဝန်းကျင်အရွယ်ရှိ စစ်သားတဦးဖြစ်ပြီး ယနေ့(ဧပြီ၁၉ရက်)တွင် ၎င်း၏အလောင်းကို တွေ့ရှိကြောင်း ဒေါင်းညီနောင် မြို့ပြပြောက်ကျားတပ်ဖွဲ့က သတင်းထုတ်ပြန်သည်။
“အလောင်းတွေ့တဲ့နေရာက ကျတော်တို့ရဲ့ မိုင်းကွင်းနေရာ ဖြစ်နေတယ်။ အလောင်းအနီးကနေ ဖုန်းတလုံးလည်းတွေ့တယ်။ ပေါ်တာဆွဲခံရတဲ့ စစ်မှုထမ်းတပ်သားဖြစ်ဖို့များတယ်။ ခြေတစ်ဖက် လက်တစ်ဖက်ပြတ်ပြီး သေနေတာ”ဟု ဒေါင်းညီနောက်ပြောက်ကျားတပ်ဖွဲ့ခေါင်းဆောင် ဗိုလ်သတ္တိက က MPAသို့ပြောသည်။
၎င်းသည် စစ်ကြောင်းအထိုင်ချနေသည့် သစ်ခေါက်တောင်ရဲစခန်းမှ ထွက်ပြေးလာစဉ် ဧပြီ ၁၄ ရက်က မိုင်းထိသေဆုံးခြင်းဖြစ်နိုင်သည်ဟု ဆိုသည်။
လက်ရှိတွင် စစ်ကောင်စီစစ်ကြောင်းသည် စလင်းမြို့နယ်၊ သစ်ခေါက်တောင်ရွာရဲစခန်း၌ပင် စခန်းချလျက်ရှိကြောင်း သိရသည်။
ပြီးခဲ့သည့် ဧပြီ ၁၄ ရက်ကလည်း သစ်ခေါက်တောင်ရဲစခန်း အထိုင်ချ ခလရ ၂၃၅ မှ ပြေးလာပြီး မိုင်းထိဒဏ်ရာရထားသည့် စစ်သားတဦးကို ဒေါင်းညီနောင် မြို့ပြပြောက်ကျားတပ်ဖွဲ့က ဖမ်းမိထားပြီး ဆေးဝါးကုသပေးနေကြောင်း ဗိုလ်သတ္တိထံက သိရသည်။
