By Nway / MPA
ရန်သူ့လေတပ်နှိမ်နင်းရေး နှစ်သစ်ကူးလက်ဆောင်အဖြစ် နေပြည်တော်၊ အေလာလေတပ်စခန်းထဲသို့ ရှော့တိုက်ဒုံးများဖြင့် တိုက်ခိုက်ခဲ့ရာ ပစ်မှတ်များသို့ ထိမှန် ခဲ့ကြောင်း သိရသည်။
ဧပြီ ၁၈ရက်၊ ညရှစ်နာရီခွဲဝန်းကျင်တွင် အေလာလေတပ်စခန်းအတွင်းသို့ ၁၀၇မမ ရှေ့တိုက်ဒုံး သုံးလုံး အောင်မြင်စွာ ပစ်ခတ်နိုင်ခဲ့ကြောင်း Brave Warriors For Myanmar က သတင်းထုတ်ပြန်သည်။
” ပစ်ဖို့ကတော့ သုံးလုံးထက်ပိုပစ်ဖို့ရည်ရွယ်ပါတယ်။ ရာသီဥတုနဲ့လုံခြုံရေးအခြေအနေအရ သုံးလုံးပဲပစ်နိုင်ခဲ့ပါတယ်။ ထိခိုက်မှုအချို့နဲ့သေဆုံးမှုအချို့ရှိတယ်လို့တော့ကနဦးသိထားရပါတယ်။ ပိုမိုခိုင်မာအတည်ပြုနိုင်အောင်ဆက်လက်စုံစမ်းနေပါတယ်ခင်ဗျ” ဟု Brave Warriors For Myanmarမှ တာဝန်ရှိသူတစ်ဦးက MPA သို့ပြောသည်။
ရှော့တိုက်ဒုံးပစ်ခတ်ပြီးပြီးချင်း စစ်ကောင်စီတပ်က လက်နက်ငယ်များဖြင့် ချက်ချင်းပြန်လည်ပစ်ခတ်ခဲ့သော်လည်း ရဲဘော်များ အထိအခိုက်မရှိပြန်လည်ဆုတ်ခွာနိုင်ခဲ့ကြောင်း သိရသည်။
” ပစ်ပြီးပြီးချင်းမှာ စကစဘက်က လက်နက်ငယ်တွေနဲ့ ချက်ချင်းပဲ ပြန်ပစ်ပါတယ်။ အရန်သင့်အနေအထားစောင့်နေတဲ့သဘောလို့ ထင်ရပါတယ်” ဟု ၎င်းကဆက်ပြောသည်။
မတ်လ ၂၈ ရက်နေ့က လှုပ်ခတ်ခဲ့သော ငလျင်ကြောင့် စစ်ကိုင်း၊ မန္တလေး နှင့် ပဲခူးတိုင်းဒေသအချို့ရှိ ပြည်သူအများအပြား ဒုက္ခပင်လယ်ဝေနေချိန်၌ပင်စစ်ကောင်စီတပ်က မြန်မာပြည်အနှံ့အပြားရှိ ပြည်သူများကို လေကြောင်းမှ အဆက်မပြတ် ဗုံးကြဲ သတ်ဖြတ်နေရာ လေကြောင်းတိုက်ခိုက်မှုပေါင်း ရာချီရှိခဲ့ပြီး ပြည်သူများလည်း ရာနှင့်ချီသေဆုံးခဲ့ကြောင်း BMWကထုတ်ပြန်သည်။
စစ်ကောင်စီတပ်သည် ငလျင်ဒဏ်ကြောင့် ထိခိုက်မှုအချို့ရှိခဲ့သော နေပြည်တော် အေလာ လေဆိပ်ကို အပျက်အစီးများကြားမှပင် ပြည်သူများအား သတ်ဖြတ်ရန် ဆက်လက်အသုံးပြုနေသေး သည့် အတွက် BWM နှင့်မဟာမိတ်အဖွဲ့များက BWM Mission 33 အား ဖော်ဆောင်ခဲ့ခြင်းဖြစ်ကြောင်းသိရသည်။
ယင်းတိုက်ခိုက်မှုကို Brave Warriors for Myanmar (BWM) အဖွဲ့၏ ဦးဆောင်စီမံမှုဖြင့် Black Leopard (ကျားသစ်နက်)အဖွဲ့နှင့် ပူးပေါင်းဆင်နွှဲခဲ့ခြင်းဖြစ်သည်။
