ပဲခူးတိုင်း၊ တောင်ငူမြို့နယ်၊ ဝက်ခေါက်စိန်ကျေးရွာစာသင်ကျောင်းတွင် တပ်စွဲထားသည့် စစ်ကောင်စီတပ်သားများတိုက်ခိုက်ခံရပြီးနောက် ထွက်ပြေးသွားသဖြင့်လက်နက်ခဲယမ်းများသိမ်းဆည်းရမိခဲ့ကြောင်း တောင်ငူခရိုင် အမှတ် ၃၅၀၁ တပ်ရင်း ဘုရင့်နောင်စစ်ကြောင်း၏ တာဝန်ရှိသူများထံမှ သိရသည်။
အဆိုပါ စစ်ကောင်စီတပ်ဖွဲ့ဝင်များကို မေ ၁၉ ရက်၊ နံနက် ၃ နာရီက စီးနင်းတိုက်ခိုက်ခဲ့ခြင်းဖြစ်ပြီး တိုက်ပွဲဖြစ်ပွားချိန် တစ်နာရီခန့်ကြာမြင့်ခဲ့ကြောင်း သိရသည်။
“ အင်အား ၃၀ လောက်ရှိမယ်၊ အပြန်အလှန်ပစ်ကြတာ၊ ကျတော်တို့ဘက်က ပစ်အားသာတော့ ထွက်ပြေးသွားကြတာ၊ ဒဏ်ရာရတဲ့သူတွေလည်းရှိတယ်၊ ကျတော်တို့ဘက်ကတော့ထိခိုက်ဒဏ်ရာရတဲ့သူမရှိပါဘူး”ဟု တောင်ငူခရိုင် အမှတ် ၃၅၀၁ တပ်ရင်း ဘုရင့်နောင်စစ်ကြောင်း၏ စစ်ကြောင်းတာဝန်ခံက MPA ကိုပြောသည်။
စစ်ကောင်စီတပ်သားများထွက်ပြေးတိမ်းရှောင်သွားပြီးနောက် စာသင်ကျောင်းအတွင်းသို့ ဝင်ရောက်ရှာဖွေရာ ၆၀ မမဆယ်လုံးနှင့် အခြားစစ်ဘက်သုံးဆိုင်ရာပစ္စည်းများသိမ်းဆည်းရရှိခဲ့ကြောင်း ၎င်းကဆက်လက်ပြောသည်။
“ရွာထဲမှာတော့ ပြည်သူတွေရှိတယ်ဗျ၊ လူတွေ၊ အိမ်တွေ ထိခိုက်တာမရှိဘူး၊ ကျတော်တို့လဲ အတတ်နိုင်ဆုံး ပြည်သူတွေ မထိခိုက်အောင်တော့လုပ်ဆောင်ခဲ့ပါတယ်”ဟု ၎င်းက ရှင်းပြသည်။
အဆိုပါကျေးရွာစာသင်ကျောင်းတွင် စစ်ကောင်စီတပ်သားများတပ်စွဲနေထိုင်သည်မှာ တစ်နှစ်ကျော် ကြာမြင့်နေပြီးဖြစ်ကြောင်း ဝက်ခေါက်စိန်ကျေးရွာတွင်နေထိုင်သည့် အသက် ၃၀ အရွယ်အမျိုးသမီးတစ်ဦးက ဆိုသည်။
“ပစ်ခတ်သံတွေကြားတော့ ရွာသားတွေလည်း အကုန်ထွက်ပြေးကြတာ။ ထိခိုက်မှုရှိလား၊ မရှိလားဆိုတာတော့သေချာ မသိရသေးဘူး။ တချို့တွေတော့ ရွာပြန်ကြည့်ကြတယ်၊ မပြန်တဲ့သူတွေလည်းရှိသေးတယ်၊ တိုက်ပွဲထပ်ဖြစ်မှာစိုးလို့”ဟု ၎င်းကပြောသည်။
ပြီးခဲ့သည့် မေ ၁၀ ရက်ကလည်း တောင်ငူလေတပ်စခန်းအား ၁၇၀ မမ ရှော့တိုက်ဒုံး ၁၀ လုံးဖြင့် တော်လှန်ရေးရဲဘော်များက ပစ်ခတ်တိုက်ခိုက်ခဲ့ကြောင်း တိုက်ခိုက်မှုကိုဦးဆောင်ခဲ့သည့် Brave Warriors for Myanmar (BWM) အဖွဲ့ထံမှ သိရသည်။