By Hsu Yee /MPA

နိုင်ငံတကာအဖွဲ့အစည်းများက ပေးအပ်သော ပစ္စည်းများကို ငလျင်ဘေးသင့်ပြည်သူများထံ ဖြန့်ဝေခြင်းမပြုဘဲ နေပြည်တော်၌ ဖြစ်သလို ထိန်းသိမ်းထားကြောင်း NUGအစိုးရ၊ နိုင်ငံတော် သမ္မတရုံး ပြောရေးဆိုခွင့်ရှိသူ ဦးကျော်ဇော်က ပြောသည်။

ဧပြီ ၂၉ရက်၊ အမျိုးသားညီညွတ်ရေးအစိုးရ (NUG) ကပြုလုပ်သည့် ပြည်သူလူထုနဲ့နိုင်ငံတကာသို့ သတင်းစကားပြောကြားခြင်းအစီအစဉ်၌ နိုင်ငံတော်သမ္မတရုံးပြောရေးဆိုခွင့်ရှိသူ ဦးကျော်ဇော်က ယင်းသို့ ဖြစ်သလို ထိန်းသိမ်းထားကြောင်း ဓာတ်ပုံမှတ်တမ်းများအရ တွေ့မြင်ရသည်ဟု ဆိုသည်။

“ မန္တ‌လေးမှာ ဆင်းရဲသားပြည်သူတွေကို ဘာမှအကူအညီမပေးလို့ အမိုးအကာမရှိ နေထိုင်ဒုက္ခရောက် နေရတဲ့ ပုံတွေဟာလည်း သက်သေတစ်ခုဖြစ်ပါတယ်။ ကိုယ်ကျိုးရှာရောင်းစားမှုတွေကြောင့် အကူအညီပစ္စည်း အစားအသောက်တချို့ စျေးကွက်ထဲ ရောက်ရှိလာတာတွေ တွေ့နေရပါတယ်” ဟု ဦးကျော်ဇော် ကပြောသည်။

စစ်ကောင်စီအနေဖြင့် ငလျင်ဘေးဒဏ်သင့်ပြည်သူများကို ကူညီရန်ပျက်ကွက်သည့်အပြင် လူသား ချင်းစာနာမှု အထောက်အကူပေးသည့် နိုင်ငံတကာအဖွဲ့အစည်းများနှင့် ပြည်တွင်းအဖွဲ့အစည်းများမှ ပေးအပ်သော အကူအညီများအား တားဆီးပိတ်ပင်၍ အနှောင့်အယှက်ပေးနေကြောင်းလည်း ၎င်းကပြောသည်။

သဘာဝဘေးရန်အတွက် ယခင် ပြည်သူ့အစိုးရလက်ထက်က ထားရှိသည့် နိုင်ငံတော် ရန်ပုံငွေကို စစ်ကောင်စီက ပုဂ္ဂလိက လုပ်ငန်းများအား ထုတ်ချေးခဲ့သည်ဟုလည်း ဦးကျော်ဇော်က ပြောသည်။