By Mg Dagon / MPA
ပြင်းအားမြင့်ငလျင်ကြောင့် ပျံလွန်/ကွယ်လွန်ခဲ့ရသည့် မန္တလေးနှင့် စစ်ကိုင်းတိုင်းတို့အတွင်းရှိ ကျန်ရစ်သူမိသားစုဝင်များထံ ယမန်နေ့ (ဧပြီလ ၂၈ ရက်)တွင် ထောက်ပံ့မှုများစတင်ပြုလုပ်ခဲ့ကြောင်း သိရသည်။
စစ်ကောင်စီသည် ပြည်တွင်းနှင့် နိုင်ငံတကာအလှူရှင်များထံမှ ကျပ်ဘီလျံသိန်းချီနှင့် နိုင်ငံခြားငွေ သန်းချီသည့်အလှူငွေများရရှိထားသည်ဟု ဒုစစ်ခေါင်းဆောင်၏ ဧပြီလ ၂၅ ရက်နေ့က အမျိုးသားသဘာဝဘေးအန္တရာယ်စီမံခန့်ခွဲရေးကော်မတီအစည်းအဝေးတွင် ပြောကြားချက်အရ သိရသည်။
ထိုငွေများအတွင်းမှ ထောက်ပံ့ငွေနှင့် ပစ္စည်းပေးအပ်ပွဲကို မန္တလေးမြို့၊ ချမ်းအေးသာစံမြို့နယ်ရှိ ဗထူးမိုးလုံလေလုံအားကစားခန်းမနှင့် စစ်ကိုင်းတိုင်း၊ စစ်ကိုင်းမြို့ ပါရမီရပ်ကွက်ရှိ နှစ် ၇၀၀ ပြည့် အားကစားခန်းမတွင်ပြုလုပ်ခဲ့သည်။
မန္တလေးမြို့က သေဆုံးခဲ့ရသူ ၂၁၅၂ ဦးအတွက် တစ်ဦးလျှင် သဘာဝဘေးစီမံခန့်ခွဲမှုကော်မတီက ကျပ် ၁၀ သိန်း၊ တိုင်းအစိုးရအဖွဲ့က ကျပ် ငါးသိန်းနှင့် ဘေးအန္တရာယ်ဆိုင်ရာစီမံခန့်ခွဲမှုဦးစီးဌာနက ကျပ် သုံးသိန်း စသဖြင့် စုစုပေါင်း ကျပ် ၁၈ သိန်းနှုန်းဖြင့် ကျပ် ၃ ဒသမ ၈၇၃ ဘီလျံကျော် ထောက်ပံ့ပေးခဲ့သည်ဟု စစ်ကောင်စီက သတင်းထုတ်ပြန်သည်။
ထို့အပြင် မန္တလေးတိုင်းအတွင်း ငလျင်ဘေးသင့်သူ ၁၃၇,၀၈၁ ဦးကို တစ်လစာအတွက် တန်ဖိုး ကျပ် ၇ ဒသမ ၂၆ ဘီလျံနီးပါးရှိ ဆန်၊ ဆီ၊ ဆား၊ ပဲ၊ ငါးပိတို့ကို ထောက်ပံ့ပေးခဲ့ကြောင်း စစ်ကောင်စီက သတင်းထုတ်ပြန်သည်။
“မရှိတဲ့သူတွေလောက်ပဲ သွားယူကြတာပါဗျာ။ သူတို့ထုတ်ပြန်ထားတဲ့ပုံတွေထဲမှာ ကြည့်လိုက်တာနဲ့ကို သိသာစေပါတယ်။ လူလတ်တန်းစားတွေက ဒီလောက်ငွေကို ယူဖို့ ရှက်ရွံ့ကြမှာပဲ။ ပိုဆိုးတာက တစ်သက်တာ ကင်မရာတွေထဲ ပါသွားမှာလေ။ နောက်မှ သွားယူတဲ့သူတွေကတော့ တစ်ကြောင်းပေါ့ဗျာ” ဟု ထိုအကြောင်းသိရှိထားသူ မန္တလေးမြို့ခံ အမျိုးသားတစ်ဦးက ပြောသည်။
နေအိမ်ပျက်စီးဆုံးရှုံးသွားရသူများအတွက် ပျက်စီးဆုံးရှုံးမှုကို စိစစ်နေဆဲဖြစ်သည်ဟု မန္တလေးတိုင်းဝန်ကြီးချုပ် မျိုးအောင်က အဆိုပါအလှူငွေထောက်ပံ့ပွဲတွင် ပြောကြားသည်။
ထို့အပြင် စစ်ကိုင်းတိုင်းအတွင်းရှိ သေဆုံးသူ ၅၄၆ ဦးအတွက် တစ်ဦးလျှင် ကျပ် ၁၀ သိန်းသာ ထောက်ပံ့ပေးခဲ့သည်ဟု သိရသည်။
“ထောက်ပံ့တယ်ဆိုတာ ကျနော်တို့တော့ မသိလိုက်ဘူး။ သွားတဲ့သူတွေလည်း သွားကြမှာပါ။ အခုပမာဏကတော့ တော်တော်နည်းပါတယ်” ဟု စစ်ကိုင်းမြို့နေ ဒေသခံတစ်ဦးက ပြောသည်။
ထို့အပြင် စစ်ကိုင်းတိုင်းအတွင်းရှိ ငလျင်ဒဏ်သင့် တော်လှန်ရေးအင်အားစုများစိုးမိုးနယ်မြေအတွင်းသို့ မည်သည့်အကူအညီမျှမရောက်ဘဲ ဖြစ်နေသည့်အတွက် အခက်အခဲတွေ့နေရသည်ဟု သိရသည်။
စစ်ခေါင်းဆောင် မင်းအောင်လှိုင်က ငလျင်ဘေးအတွက် ကနဦးသုံးစွဲရန်ဟုဆိုကာ မန္တလေးတိုင်းအတွက် ကျပ်ဘီလျံ ၆၀၊ စစ်ကိုင်းတိုင်းအတွက် ကျပ်ဘီလျံ ၅၀၊ နေပြည်တော်အတွက် ကျပ် ၁၀ ဘီလျံနှင့် ရှမ်းပြည်နယ်အတွက် ကျပ် ၅ ဘီလျံပေးအပ်ထားကြောင်း စစ်ကောင်စီက သတင်းထုတ်ပြန်ထားသည်။
သို့သော် ဧပြီလ ၂၄ ရက်နေ့အထိ စစ်ကောင်စီထံ ငလျင်ဘေးအလှူငွေ ကျပ် ၁၁၅,၈၇၆ ဘီလျံ၊ အမေရိကန်ဒေါ်လာ ၂ ဒသမ ၄၃၇ သန်း၊ ကိုရီးယားဝမ် ၅ သန်း၊ အိန္ဒိယရူပီး ၁၅ သန်း၊ ထိုင်းဘတ် ၂ သန်းနှင့် စင်ကာပူဒေါ်လာ ၃၁၅၀ ရရှိထားပြီးဖြစ်သည်ဟု ဒုစစ်ခေါင်းဆောင် စိုးဝင်းက ပြီးခဲ့သည့်ဧပြီလ ၂၅ ရက်နေ့ကပြုလုပ်ခဲ့သည့် အမျိုးသားသဘာဝဘေးအန္တရာယ်စီမံခန့်ခွဲရေးကော်မတီ အစည်းအဝေးတွင် ပြောကြားထားသည်။
