By Mg Dagon / MPA
သမိုင်းဝင်ငလျင်ကြီးလှုပ်ခတ်မှုအတွက် လှူဒါန်းမှုများပြုလုပ်နေကြသော်လည်း ယနေ့ ဧပြီ ၂၈ ရက် တစ်လပြည့် သည်အထိ အမှန်တကယ်လိုအပ်နေသူများထံ ရောက်သင့်သလောက် မရောက်ရှိဘဲဖြစ်နေကြောင်း ဒေသခံများထံမှ သိရသည်။
ရစ်ချ်တာစကေး ၇ ဒသမ ၇ အဆင့်ရှိ အင်အားပြင်းငလျင်ကြီးကြောင့် ထိခိုက်ခံစားခဲ့ရသူအများစုမှာ လူလတ်တန်းစားများဖြစ်သော်လည်း ပုဂ္ဂလိကလှူဒါန်းသူများနှင့် နိုင်ငံတကာက လှူဒါန်းမှုများသည် ၎င်းတို့ဆီမရောက်ရှိဘဲဖြစ်နေကြောင်း ထိုအကြောင်း လေ့လာသိရှိထားသူများထံမှ သိရသည်။
“အခု တကယ် ဒုက္ခရောက်နေတာ လူလတ်တန်းစားတွေပါ။ ပြိုတာက တိုက်တွေ။ ဘယ်ဆင်းရဲသားမှ တိုက်နဲ့ မနေနိုင်ဘူးလေ။ အရမ်းချမ်းသာတဲ့လူကျတော့ အိမ်တစ်လုံးပြိုတာ မက်မနေဘူး။ တခြား အသက်အန္တရာယ်ကင်းတဲ့နေရာ ပြေးပြီ။ လူလတ်တန်းစားကျတော့ ရှိတာမှ ဒါလေး ရှိတာကို ပစ်လည်း မပြေးနိုင်၊ အလှူခံရအောင်လည်း အနေအထားတစ်ခုအရ ရှက်တာရော ဘာရောညာရောနဲ့ ထုတ်မပြောရဲ၊ အခု မြင်နေရတဲ့ အလှူလက်ခံနေတဲ့ လူအများစုပေါ့လေ၊ Original ဆင်းရဲသူတွေ၊ ကျူးတွေပါ” ဟု မန္တလေးမြို့ခံ အမျိုးသားတစ်ဦးက ပြောသည်။
ထို့ကြောင့် ကိုယ်တိုင်လှူမည့်သူများအနေဖြင့် သေချာလိုက်လံစုံစမ်းပြီးမှသာ လှူဒါန်းငွေနှင့် ပစ္စည်းများကို ပြုလုပ်စေလိုသည်ဟု ၎င်းက မှတ်ချက်ပြုသည်။
“ကျတော်ကတော့ တစ်ရက်နှစ်ရက် သေချာလေ့လာပြီးမှ ကိုယ်နိုင်သလောက် လိုက်ကူညီခဲ့တယ်။ ကိုယ်လည်း ဆုံးရှုံးမှုတွေနဲ့ဆိုတော့ အများကြီး မတတ်နိုင်ဘူး။ (ကျပ်သိန်း)သုံးလေးဆယ်ဖိုးလောက်ပဲ လိုအပ်တာ ဝယ်ခြမ်းလှူခဲ့တယ်” ဟု အဆိုပါအမျိုးသားက ပြောသည်။
ထို့အပြင် အလှူလက်ခံသူအချို့မှာလည်း လှူဒါန်းသမျှပစ္စည်းများကို အမှန်တကယ်မလိုအပ်ဘဲ လိုက်လံစုဆောင်းပြီး စွန့်ပစ်မှုများပြုလုပ်နေကြသည်ဟု ငလျင်ဒဏ်ခံဒေသများရှိ မျက်မြင်တွေ့ရှိသူများက ပြောသည်။
“ထမင်းထုပ်လှူတယ်။ သုံးယောက်လှူရင် သုံးခါယူတယ်။ ဟင်းလေးပဲယူပြီး ထမင်းတွေ ပစ်ထားခဲ့တာတွေ ရှိတယ်။ အဲဒီတော့ လှူတဲ့လူ အလကားဖြစ်ရော။ တန်းစီပြီး ယူတဲ့လူ အများစုကိုကြည့်လိုက် ဘယ်သူတွေဖြစ်မယ်ထင်လဲ။ ကျနော်တို့လို လူလတ်တန်းစားတွေက သူတို့နဲ့ တိုးဝှေ့ပြီး တန်းမစီရဲဘူးဗျ” ဟု စစ်ကိုင်းမြို့ခံတစ်ဦးက ပြောသည်။
ထို့ပြင် အိမ်ပြိုသွားရသူအများစုတွင် အိုးခွက်ပန်းကန်များလိုချက်ရှိနေသည့်အတွက် ပေးလှူသင့်သည်ဟု မန်းမြို့ခံ ကွန်ပျူတာ၊ ဖုန်းနှင့် ဆက်စပ်ပစ္စည်းအရောင်းဆိုင်ပိုင်ရှင်တစ်ဦးက ပြောသည်။
“အရေးတကြီးလိုတာက အိမ်ပြိုသွားတဲ့ လူတွေမှာ ထမင်းဟင်း၊ ခေါက်ဆွဲခြောက်လာလှူလို့ ထည့်စားစရာ ပန်းကန်၊ ဇွန်း၊ ခွက်မရှိဘူးဗျ။ ကျနော်လည်း သူငယ်ချင်းတွေနဲ့ တိုင်ပင်နေတယ်။ ဒါလေးတစ်ခု ထပ်လုပ်ပေးချင်တာ” ဟု ၎င်းက ပြောသည်။
တဖန် လက်ရှိမန္တလေးမြို့အတွင်း ငလျင်အလှူခံစားသည့်အဖွဲ့များလည်းပေါ်ပေါက်နေပြီး ယင်းဂယက်ထနေသည်ဟု သိရသည်။
“လုပ်စားတဲ့သူတွေက ငလျင်ရှောင်ဆိုပြီးတော့ တချို့ကွင်းတွေမှာ Tent ထိုးပြီးနေတဲ့သူတွေလည်း များတယ်။ အဲဒီလိုလူတွေကို နှင်ထုတ်လိုက်တာမျိုးတော့တွေ့တယ်။ လမ်း ၃၀ မင်္ဂလာဈေးဟောင်းနားမှာ နေတဲ့သူတွေကို မောင်းထုတ်လိုက်တာတွေ့တယ်။ တကယ်ဒုက္ခရောက်တဲ့သူတွေလည်းရှိတာပေါ့” ဟု မန္တလေးမြို့ခံ အမျိုးသမီးတစ်ဦးက ပြောသည်။
ထို့အပြင် စစ်ကောင်စီ၏ ထောက်ပံ့မှုများမှာလည်း တစ်လပြည့်ကာလအထိ ပြည်သူများထံ ရောက်ရှိလာခြင်းမရှိသေးဘဲ စာရင်းကောက်သည့်အဆင့်သာ ရှိနေဆဲဖြစ်ကြောင်း သိရသည်။
စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ငလျင်ကြောင့် သေဆုံးခဲ့ရသူ တစ်ဦးလျှင် ကျပ် ၁၀ သိန်းပေးမည်ဟု ပြီးခဲ့သည့် ဧပြီလ ၅ ရက်နေ့ကပြုလုပ်ခဲ့သည့် စစ်ကောင်စီအစိုးရအဖွဲ့အစည်းအဝေးအတွင်း ပြောထားသည်။
သို့သော် ထိခိုက်ဒဏ်ရာရသူနှင့် အဆောက်အအုံ၊ အိမ် ပြိုပျက်ခဲ့ရသူများကိုမူ သင့်လျော်သလောက် ထောက်ပံ့မည်ဟုသာ ပြောကြားထားသည်။
ထို့အပြင် အစောပိုင်းကယ်ဆယ်ရေးအတွက်ဟုဆိုကာ စစ်ခေါင်းဆောင်က မန္တလေးတိုင်းအတွက် ကျပ်ဘီလျံ ၆၀ ၊ စစ်ကိုင်းတိုင်းအတွက် ကျပ်ဘီလျံ ၅၀၊ နေပြည်တော်အတွက် ကျပ် ၁၀ ဘီလျံနှင့် ရှမ်းပြည်အတွက် ကျပ် ၅ ဘီလျံတို့ကို ပေးအပ်ထားသည်ဟု ပြီးခဲ့သည့် ဧပြီ ၂၅ ရက်နေ့က ပြုလုပ်ခဲ့သည့် စစ်ကောင်စီ၏ အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီအစည်းအဝေးတွင် ဒုစစ်ခေါင်းဆောင် စိုးဝင်းက ပြောကြားထားသည်။
ဧပြီလ ၂၄ ရက်နေ့အထိ စစ်ကောင်စီထံတွင် ငလျင်ဘေးအလှူငွေ ကျပ် ၁၁၅,၈၇၆ ဘီလျံ၊ အမေရိကန်ဒေါ်လာ ၂ ဒသမ ၄၃၇ သန်း၊ ကိုရီးယားဝမ် ၅ သန်း၊ အိန္ဒိယရူပီး ၁၅ သန်း၊ ထိုင်းဘတ် ၂ သန်းနှင့် စင်ကာပူဒေါ်လာ ၃၁၅၀ ရရှိထားပြီး စတင်အသုံးပြုနေပြီဟု ၎င်းက ပြောထားသည်။
